Toshkent shahar hokimi vazifasini bajaruvchi Baxtiyor Rahmonov BAAning Abu Dhabi Sewerage Services Company boshqaruvchi va bosh ijrochi direktori Ahmad Al Shamsi boshchiligidagi kompaniya mutasaddilari bilan uchrashdi. Bu haqda poytaxt hokimligi matbuot xizmati xabar berdi.
Uchrashuvda Abu Dhabi Sewerage Services Company hamkorlari — FICHTER Water & Transportation Gmbh (Germaniya) va MARUBENI CORPORATION (Yaponiya) kompaniyalari masʼullari, “O‘zsuvtaʼminot” AJ raisi Sohib Saifnazarov, shahar hokimi o‘rinbosarlari hamda “Toshkent shahar suv taʼminoti” MCHJ mutasaddilari ishtirok etgan.
O‘zaro muloqot davomida Toshkent viloyati Quyi Chirchiq tumanining “Surum” MFY hududida barpo etilishi rejalashtirilgan Oqava suvlarni yig‘ish va tozalash inshootini loyihalash, qurish, zaruriy infratuzilmani yaratish, mavjud tizimlar bilan integratsiya qilishga oid tashkiliy va texnik masalalar atroflicha ko‘rib chiqilgan.
Ahmad Al Shamsi loyiha haqida maʼlumot berar ekan, bugungi kunda Abu Dhabi Sewerage Services Company qatori, FICHTER Water & Transportation Gmbh (Germaniya) va MARUBENI CORPORATION (Yaponiya) kompaniyalarining masʼul mutaxassislari ish olib borayotganini bildirgan.
Hozirda mutaxassislar inshoot loyihasi va dizayni borasida ishlayotganini aytib, buning uchun shaharning o‘sish sur’atlari, aholi soni va buning yaqin kelajakka oid prognozi ham muhimligini taʼkidlagan. Shuningdek, 4 yilga mo‘ljallangan ushbu loyiha ikki komponentdan iboratligi hamda ikki bosqichda amalga oshirilishini, tayyor bo‘lganda umumiy hisobda sutkasiga 1,5 million metr kub oqava suvlarni qabul qilib, tozalashini bildirgan. Uning ishga tushirilishi “Salar”, “Bektemir” va qisman “Bo‘zsuv” inshootlariga yo‘naltirilayotgan oqava suvlarni to‘liq qamrab olishini qayd etilgan.
Baxtiyor Rahmonov bu Toshkent uchun nihoyatda ahamiyatli loyihalardan biri ekaniga eʼtibor qaratib, uni mukammal qilib tayyorlash hamda ishga tushirish uchun shahar hokimligida kerakli barcha mutaxassislardan iborat Ishchi guruhini tashkil etish taklifini ilgari surgan. Ahmad Al Shamsi bu taklifni qo‘llab-quvvatlagan va tomonlar amaliy muloqotlarda davom etishga kelishib olgan.
Avvalroq respublika aholisini markazlashgan ichimlik suvi bilan ta’minlash darajasi 77 foizga yetkazilishi to‘g‘risida xabar berilgandi. Yildan yilga o‘tuvchi 54 ta va yangidan boshlanuvchi 17 ta obyektda 105 ta inshoot va 1,4 ming kilometr ichimlik suv va oqova suv tarmoqlari quriladi.
Izoh (0)