Mavritaniya qirg‘oqlarida 89 nafar muhojir dengizda cho‘kib halok bo‘ldi

Mavritaniya qirg‘oqlarida joriy hafta boshida 89 nafar muhojir dengizda cho‘kib halok bo‘lgan. Bu haqda mamlakat mahalliy manbalariga tayanib, Al Arabiya xabar berdi.

Manbada aytilishicha, muhojirlar kemada Yevropa tomon suzib ketishayotgan bo‘lgan. Kuchli to‘lqin kelishi oqibatida kema ag‘darilib ketgan va uning ichidagi fuqarolar halok bo‘lgan.

Mavritaniya davlat axborot agentligi va mahalliy rasmiylardan biri 5-iyul kuni muhojirlar bilan bog‘liq ayanchli hodisa ro‘y berganini tasdiqlagan. Hozirda jasadlarni qidirish ishlari davom etayotgani aytilgan.

Kema ag‘darilishida cho‘kib halok bo‘lganlar bilan bir qatorda yana bir necha o‘nlab fuqarolar bedarak yo‘qolgan. Hukumat halok bo‘lganlar shaxsini aniqlash uchun eʼlon berib, ularning qarindoshlarini tergov idorasi bilan hamkorlik qilishga chaqirgan.

“Mavritaniya qirg‘oq qo‘riqlash xizmati 1-iyul, dushanba kuni Atlantika okeani sohilida ag‘darilib ketgan yirik baliqchilar kemasi bortidan 89 kishining jasadini topdi. Kema mamlakatning janubi-g‘arbidagi Ndiago shahridan to‘rt kilometr uzoqlikda ag‘darilib ketgan”, — deyiladi davlat axborot agentligi xabarida.

Sohil qo‘riqlash xizmati ag‘darilgan kemadan faqat to‘qqiz kishini qutqarib olgan. Ular orasida besh yoshli qizcha ham bo‘lgan.

So‘nggi maʼlumotlarga ko‘ra, kema G‘arbiy Afrikadagi Gambiya va Senegal hududlaridan Yevropa tomon yo‘lga chiqqan. Dastlab uning bortida 170 nafar yo‘lovchi bo‘lgan. Aniqlangan jasadlar va qutqarilganlardan tashqari 72 kishi dengizda bedarak yo‘qolgan.