Tunis sohilidan 18-may kuni Italiya tomon qayiqda suzib ketgan 23 nafar muhojir O‘rta Yer dengizida bedarak yo‘qoldi. Bu haqda Tunis milliy gvardiyasi bergan maʼlumotga asoslanib, Reuters nashri xabar berdi.
Manbada aytilishicha, noqonuniy muhojirlar Italiya janubiga borishni rejalashtirib yo‘lga chiqqan. Sayohat boshlanganidan bir necha soat o‘tgach qayiq izsiz yo‘qolgani maʼlum qilingan.
Shimoliy Afrikada joylashgan Tunis migratsiya inqirozini boshdan kechirmoqda. Mamlakat fuqarolari Yevropada yaxshiroq hayot kechirish umidida tobora ko‘proq O‘rta Yer dengizini kechib o‘tishmoqda.
Tunis milliy gvardiyasi dengiz-qutqaruv guruhlari qayiq va undagi muhojirlarni izlash bilan shug‘ullanayotgani maʼlum qilingan. O‘rta Yer dengizi bo‘yidagi mamlakatlardan muhojirlar aniqlangan taqdirda xabar berish so‘ralgan.
Yevropa tomon harakatlanadigan noqonuniy muhojirlarning katta qismi Tunis va unga qo‘shni Liviya hududlaridan jo‘nab ketadi. Ushu mamlakatlardagi ishlab chiqarishning pastligi va fuqaroviy beqarorlik migratsiya yuzaga kelishi uchun asosiy omil sifatida ko‘riladi.
Izoh (0)