Мавритания қирғоқларида жорий ҳафта бошида 89 нафар муҳожир денгизда чўкиб ҳалок бўлган. Бу ҳақда мамлакат маҳаллий манбаларига таяниб, Al Arabiya хабар берди.
Манбада айтилишича, муҳожирлар кемада Европа томон сузиб кетишаётган бўлган. Кучли тўлқин келиши оқибатида кема ағдарилиб кетган ва унинг ичидаги фуқаролар ҳалок бўлган.
Мавритания давлат ахборот агентлиги ва маҳаллий расмийлардан бири 5 июль куни муҳожирлар билан боғлиқ аянчли ҳодиса рўй берганини тасдиқлаган. Ҳозирда жасадларни қидириш ишлари давом этаётгани айтилган.
Кема ағдарилишида чўкиб ҳалок бўлганлар билан бир қаторда яна бир неча ўнлаб фуқаролар бедарак йўқолган. Ҳукумат ҳалок бўлганлар шахсини аниқлаш учун эълон бериб, уларнинг қариндошларини тергов идораси билан ҳамкорлик қилишга чақирган.
“Мавритания қирғоқ қўриқлаш хизмати 1 июль, душанба куни Атлантика океани соҳилида ағдарилиб кетган йирик балиқчилар кемаси бортидан 89 кишининг жасадини топди. Кема мамлакатнинг жануби-ғарбидаги Ндиаго шаҳридан тўрт километр узоқликда ағдарилиб кетган”, — дейилади давлат ахборот агентлиги хабарида.
Соҳил қўриқлаш хизмати ағдарилган кемадан фақат тўққиз кишини қутқариб олган. Улар орасида беш ёшли қизча ҳам бўлган.
Сўнгги маълумотларга кўра, кема Ғарбий Африкадаги Гамбия ва Сенегал ҳудудларидан Европа томон йўлга чиққан. Дастлаб унинг бортида 170 нафар йўловчи бўлган. Аниқланган жасадлар ва қутқарилганлардан ташқари 72 киши денгизда бедарак йўқолган.
Изоҳ (0)