“Mustaqillikdan to 2017-yilga qadar korrupsiyaga qarshi kurashish bo‘yicha ilmiy ish ham, tadqiqot ham qilinmagan” — Yevgeniy Kolenko

“Korrupsiya” so‘zi 2017-yildan keyin normativ bazaga kirib kelgan. Bu haqda Huquqni muhofaza qilish akademiyasi boshlig‘ining birinchi o‘rinbosari Yevgeniy Kolenko 3-iyul kuni Korrupsiyaga qarshi kurashish agentligida bo‘lib o‘tgan matbuot anjumanida aytib o‘tdi, deya xabar bermoqda “Daryo” muxbiri.

Anjumanda “Aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish chora-tadbirlari to‘g‘risida”gi prezident qarorining mazmun-mohiyati yuzasidan jurnalistlar savollariga javob berildi.

Tadbirda ishtirok etgan Huquqni muhofaza qilish akademiyasi boshlig‘ining birinchi o‘rinbosari Yevgeniy Kolenko O‘zbekiston hukumati korrupsiya borligini 2017-yilda tan olgan.

O‘sha yili “Korrupsiyaga qarshi kurashish to‘g‘risida”gi qonun qabul qilingan. Undan keyin korrupsiya so‘zi normativ bazaga kirib keldi va ilmiy omma uchun ham yangilik bo‘ldi, — dedi Yevgeniy Kolenko.

Akademiya mas’ulining alohida ta’kidlashicha, mustaqillikdan — 1991-yildan 2017-yilga qadar korrupsiyaga qarshi kurashish bo‘yicha ilmiy ish ham, tadqiqot ham qilinmagan.

Prezident qaroriga ko‘ra, 2025- yil 1-yanvardan aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirishga qaratilgan “Korrupsiyaga qarshi kurashish virtual akademiyasi” elektron platformasi joriy etiladi. Virtual akademiyada o‘quv faoliyatini tashkil etish va yuritish Korrupsiyaga qarshi kurashish agentligi hamda Huquqni muhofaza qilish akademiyasi tomonidan amalga oshiriladi.

Virtual akademiyada o‘qitish quyidagi kontingent uchun olib boriladi:

• aholi, tadbirkorlik subyektlari, nodavlat notijorat tashkilotlari va boshqa fuqarolik jamiyati institutlari vakillari;
• ta’lim tashkilotlari tarbiyalanuvchilari, o‘quvchilari va talabalari;
• davlat organlari va tashkilotlarining davlat xizmatchilari;
• davlat ishtirokidagi korxonalarning xodimlari.

Virtual akademiyada o‘qitish bazaviy (barcha foydalanuvchilar uchun bepul) hamda maxsus o‘quv kurslari (to‘lov-shartnoma asosida) bo‘yicha yo‘lga qo‘yiladi.