Bugun, 3-iyul kuni Korrupsiyaga qarshi kurashish agentligida “Aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish chora-tadbirlari to‘g‘risida”gi prezident qarorining mazmun-mohiyatiga bag‘ishlangan matbuot anjumani bo‘lib o‘tdi. Bu haqda “Daryo” muxbir xabar bermoqda.
-02z8FdSA.jpg)
Anjumanda Korrupsiyaga qarshi kurashish agentligi direktorining o‘rinbosari Umida To‘xtasheva mazkur qarorning qabul qilinishi zaruratiga to‘xtalib o‘tdi:
- Birinchidan, bugungi kunda aholi va davlat xizmatchilarini korrupsiyaga qarshi kurashish sohasidagi bilimlarini uzluksiz oshirib borish tizimi mavjud emas;
- Ikkinchidan, korrupsiyaga qarshi ichki nazorat tuzilmalari xodimlarining malakasini oshirish tizimi yo‘lga qo‘yilmagan;
- Uchinchidan, soha bo‘yicha milliy va xalqaro asoslar, xorijiy tajriba, ilmiy-amaliy ishlanmalar bo‘yicha elektron ma’lumotlar bazasi shakllanmagan.
“Ijtimoiy fikr” respublika jamoatchilik fikrini o‘rganish markazi bilan birgalikda o‘tkazilgan tadqiqot natijalariga ko‘ra, 31 foiz respondentlar fuqarolarning o‘z masalalari yoki muammolarini qonunni chetlab o‘tgan holda hal etishga intilishi, 28 foizi esa fuqarolarning qonunlar va o‘z huquqlarini yaxshi bilmasligi korrupsiyaviy munosabatlar paydo bo‘lishining asosiy sabablari sifatida ko‘rsatilgan.
Yoshlar o‘rtasida o‘tkazilgan so‘rovnomada atigi 51 foiz respondentlargina korrupsiyaning mohiyatini to‘g‘ri tushunishini ta’kidlagan.
Aniqlanishicha, fuqarolarni korrupsiyaviy munosabatlarga va noqonuniy xatti-harakatlarga undaydigan asosiy sabablar byurokratik paysalga solinishlardan qutulish istagi, mavjud muammolarni hal qilishga intilish yoki shunga ehtiyoj, muammoni qonuniy hal qilish uchun vaqt yoki imkoniyatning yo‘qligi hisoblanadi. Shuningdek, pora yordamida masalalarni hal qilish odatiy amaliyot, umumqabul qilingan xatti-harakat, muammoni hal qilishda yordam bergan mansabdor shaxsga minnatdorchilik bildirish shakli hisoblanadi, degan tasavvur jamoatchilikda keng tarqalgan.
Avvalroq 2023-yilda respublika bo‘yicha jami 6 535 nafar shaxs korrupsiyaga oid jinoyatlar uchun jinoiy javobgarlikka tortilgan bo‘lib, 2022-yilga nisbatan javobgarlikka tortilganlar soni 879 nafarga yoki 12 foizga kamaygani to‘g‘risida xabar berilgandi.
Izoh (0)