Коррупцияга қарши курашиш агентлиги ва “Ижтимоий фикр” маркази томонидан апрель—май ойларида ўтказилган “Фуқаролар Ўзбекистонда коррупция тўғрисида” мавзусидаги социологик тадқиқот натижалари эълон қилинди. Бу ҳақда агентлик матбуот хизмати хабар берди.
Қайд этилишича, 2022 йилда ўтказилган сўров билан қиёсланганда, коррупцияга муросасиз, унинг оқибатларини тўла англаган аҳоли вакиллари фоизи деярли 20 фоизга ортган. 2024 йилги сўровда респондентларнинг аксарияти — 91,2 фоиз (2022 йилда 72,1 фоиз) фуқароларнинг ўз муаммоларини ҳал қилиш учун пора беришига салбий, 6,3 фоиз (4,7 фоиз) нейтрал, бефарқ, атиги 2,3 фоиз ижобий муносабатини намойиш қилган.
Сўров натижаларига кўра, 42,5 фоиз респондентлар мамлакатда коррупциянинг тарқалганлик даражасини “ўртача” дея баҳолаган, 18,9 фоиз коррупция даражаси “юқори”, 11,6 фоиз “паст” деган фикрда. Коррупциявий вазиятга тушган респондентларнинг улуши 21,2 фоизни ташкил этган, 78,8 фоиз эса коррупцияга оид ҳуқуқбузарликларга шахсан дуч келмаганини қайд этган.
Тадқиқот натижаларига кўра, фуқароларнинг фикри асосида, коррупциявий вазиятга тушиб қолиш хавфи юқори бўлган энг коррупциялашган давлат органлари, вазирлик ва идораларнинг рейтинги тузилган. Олинган жавобларга кўра, ўзбекистонликлар кўпинча ўз муаммолари ёки масалаларини норасмий ҳал қилиш ҳолатига Соғлиқни сақлаш, Олий таълим, фан ва инновациялар, Мактабгача ва мактаб таълими, Бандлик ва камбағалликни қисқартириш, Қурилиш ва уй-жой-коммунал хўжалиги, Ички ишлар вазирлиги каби тузилмаларда дуч келишади.
Ўтказилган тадқиқотнинг кўрсатишича, 46,3 фоиз фуқароларнинг фикрича, мамлакатда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупцияни келтириб чиқарувчи омилларни бартараф этишга қаратилган чора-тадбирлар мамлакатда коррупция даражасини пасайтиришга ёрдам бермоқда. 26,9 фоиз сўралганларнинг фикрича, кўрилаётган чора-тадбирларга қарамасдан, коррупциянинг даражаси ўсишда давом этмоқда.
Аниқланишича, фуқароларни коррупциявий муносабатларга ва ноқонуний хатти-ҳаракатларга ундайдиган асосий сабаблар бюрократик пайсалга солинишлардан қутилиш истаги, мавжуд муаммоларни ҳал қилишга интилиш ёки шунга эҳтиёж, муаммони қонуний ҳал қилиш учун вақт ёки имкониятнинг йўқлиги ҳисобланади. Шунингдек, пора ёрдамида масалаларни ҳал қилиш одатий амалиёт, умумқабул қилинган хатти-ҳаракат, муаммони ҳал қилишда ёрдам берган мансабдор шахсга миннатдорчилик билдириш шакли ҳисобланади, деган тасаввур жамоатчиликда кенг тарқалган.
Аввалроқ 2023 йилда Республика бўйича жами 6 535 нафар шахс коррупцияга оид жиноятлар учун жиноий жавобгарликка тортилган бўлиб, 2022 йилга нисбатан жавобгарликка тортилганлар сони 879 нафарга ёки 12 фоизга камайгани тўғрисида хабар берилганди.
Изоҳ (0)