Joriy yilning 20-iyun oqshomida Manxettendagi Zamonaviy san’at muzeyida rejissyor Yorgos Lantimosning “Mehrning ming turi” (“Kinds of kindness”) nomli yangi filmining premyerasi bo‘lib o‘tdi.
Noodatiy janrdagi filmlarni suratga oluvchi rejissyor “Bechoralar-baxtsizlar” ilmiy-fantastik filmidagi aktyorlar — Emma Stoun va Uillem Defo ishtirokida yangi film suratga oldi.
Shuningdek, rollarda Jessi Plemons, Margaret Kuelli, Xong Chau, Jo Elvin (xonanda Teylor Sviftning sobiq qallig‘i) va boshqalar ishtirok etdi.
Namoyish boshlanishidan avval bosh rolni ijro etgan aktyor va aktrisalar qizil gilam bo‘ylab kirib keldi. Ikki karra “Oskar” mukofoti sovrindori Emma Stoun qora Louis Vuitton libosida tashrif buyurdi. Garchi “Oskar” taqdim etish marosimida uning ko‘ylagi yirtilib ketgan bo‘lsa-da, aftidan, aktrisa fransuz brendi bilan hamkorlik qilishdan bosh tortmaslikka qaror qilgan.
Turmush o‘rtog‘i Jessi Plemonsni qo‘llab-quvvatlash uchun tashrif buyurgan aktrisa Kirsten Danst uzun va yorqin sariq rangli ko‘ylakda namoyon bo‘ldi.
O‘tgan yili yozda musiqachi Jek Antonoffga turmushga chiqqan aktrisa Margaret Kuelli esa nafis oq libosda tashrif buyurishni afzal ko‘rdi.
Ma’lumot uchun: “Mehrning ming turi” filmining premyerasi 77-sonli Kann kinofestivalida bo‘lib o‘tdi, unda film bosh mukofot — “Oltin palma yaprog‘i” uchun kurashdi. Biroq film mag‘lub bo‘ldi va sovrin Shon Beykerning “Anora” filmiga nasib etdi. Filmda bosh rollardan birini ijro etgan Jessi Plemons “Eng yaxshi erkak roli” nominatsiyasida e’tirof etildi.
Foto: People Talk
Izoh (0)