Жорий йилнинг 20 июнь оқшомида Манхеттендаги Замонавий санъат музейида режиссёр Йоргос Лантимоснинг “Меҳрнинг минг тури” (“Kinds of kindness”) номли янги фильмининг премьераси бўлиб ўтди.
Ноодатий жанрдаги фильмларни суратга олувчи режиссёр “Бечоралар-бахтсизлар” илмий-фантастик фильмидаги актёрлар — Эмма Стоун ва Уиллем Дефо иштирокида янги фильм суратга олди.
Шунингдек, ролларда Жесси Племонс, Маргарет Куэлли, Хонг Чау, Жо Элвин (хонанда Тейлор Свифтнинг собиқ қаллиғи) ва бошқалар иштирок этди.
Намойиш бошланишидан аввал бош ролни ижро этган актёр ва актрисалар қизил гилам бўйлаб кириб келди. Икки карра “Оскар” мукофоти совриндори Эмма Стоун қора Louis Vuitton либосида ташриф буюрди. Гарчи “Оскар” тақдим этиш маросимида унинг кўйлаги йиртилиб кетган бўлса-да, афтидан, актриса француз бренди билан ҳамкорлик қилишдан бош тортмасликка қарор қилган.
Турмуш ўртоғи Жесси Племонсни қўллаб-қувватлаш учун ташриф буюрган актриса Кирстен Данст узун ва ёрқин сариқ рангли кўйлакда намоён бўлди.
Ўтган йили ёзда мусиқачи Жек Антоноффга турмушга чиққан актриса Маргарет Куэлли эса нафис оқ либосда ташриф буюришни афзал кўрди.
Маълумот учун: “Меҳрнинг минг тури” фильмининг премьераси 77-сонли Канн кинофестивалида бўлиб ўтди, унда фильм бош мукофот — “Олтин палма япроғи” учун курашди. Бироқ фильм мағлуб бўлди ва соврин Шон Бейкернинг “Анора” фильмига насиб этди. Фильмда бош роллардан бирини ижро этган Жесси Племонс “Энг яхши эркак роли” номинациясида эътироф этилди.
Фото: People Talk
Изоҳ (0)