Rossiyada AQSH foydasiga josuslik qilishda gumonlangan jurnalist 20 yilga qamalishi mumkin. Bu haqda rus nashrlari tarqatgan xabarlarga asoslanib, BBC xabar berdi.
Manbada aytilishicha, The Wall Street Journal muxbiri Evan Gershkovich ustidan sud jarayoni boshlangan. Bunga qadar u josuslik ayblovi ortidan 15 oydan ko‘proq hibsda saqlab kelingan.
Gershkovich ancha oldin o‘z nashri uchun reportaj tayyorlayotgan bir paytda Rossiyaning Yekaterinburg shahrida hibsga olingan. So‘ngra Moskvadagi hibsxonaga olib kelingan.
Jurnalistning ishi Sverdlovsk viloyat sudida ko‘rilgan. Jarayonlarni bevosita kuzatish uchun bir qancha nashrlar xodimlariga ruxsat berilgan.
Prokurorlarning taʼkidlashicha, amerikalik jurnalist AQSH Markaziy razvedka boshqarmasi topshirig‘i bilan Yekaterinburg yaqinidagi Rossiya tank ishlab chiqarish birlashmalari haqida maxfiy maʼlumotlarni to‘plagan. So‘ngra ularni muntazam ravishda G‘arbga uzatib kelgan.
Jurnalist Gershkovich, uning ish beruvchisi va AQSH hukumati ayblovni keskin rad etgan. Agar jurnalistning aybdorligi tasdig‘ini topsa, u 20 yilga ozodlikdan mahrum qilinishi mumkinligi haqida xabar berilgan.
Rossiya rasmiylari jurnalistni ayblash uchun dalillar yetarli ekanini bildirgan. Dalil sifatida jurnalist tayyorlagan videolarda strategik muhim bino va obyektlar ko‘ringani, harbiy binolar tasvirga olingani keltirilgan.
Izoh (0)