Estoniyada Rossiya foydasiga josuslik qilishda ayblangan professor 6 yilga qamaldi

Estoniyada Rossiya foydasiga josuslik qilishda ayblangan professor 6 yilga ozodlikdan mahrum qilindi. Bu haqda The Moscow Times nashri xabar berdi.

Manbada aytilishicha, Estoniya sudi 18-iyun kuni rossiyalik universitet professori Vyacheslav Morozovni 6 yil-u 3 oyga ozodlikdan mahrum etgan. Unga Boltiqbo‘yi davlatida Moskva nomidan josuslik qilganlik ayblovi qo‘yilgan.

Siyosatshunos va Tartu universitetining sobiq professori Morozov “Xorijiy razvedka xizmati nomidan, Moskva manfaati uchun Estoniya Respublikasiga qarshi faoliyatda aybdor deb topildi”, — deyilgan Estoniya tomoni eʼlon qilgan bayonotda.

Sudning taʼkidlashicha, Morozov Estoniyaning ichki va mudofaa siyosati, shuningdek, davlat amaldorlari va infratuzilma haqida maʼlumot to‘plagan. Keyinchalik bu maʼlumotlarni Rossiya razvedka xizmatlariga yetkazgan.

Estoniya rasmiylarining aytishicha, akademik 1990-yillarda, hali talaba bo‘lganida Rossiya razvedka xizmatlari tomonidan ishga olingan. Yillar davomida ushbu xizmatlar bilan aloqa almashib turgan.

Morozov joriy yilning yanvar oyi boshida Estoniya Ichki xavfsizlik xizmati tomonidan josuslikda gumonlanib hibsga olingan. Unga qarshi jinoiy ish qo‘zg‘atilganidan so‘ng, u Tartu universitetidagi o‘qituvchilik lavozimidan bo‘shatilgan.

Morozov hibsga olinishidan oldin Facebook tarmog‘ida Tallinda yashovchi ruslar tomonidan uyushtirilgan urushga qarshi tadbirlar, shuningdek, fuqarolik jamiyati va Rossiyadagi siyosiy repressiyalar haqidagi o‘z tadqiqotlari haqida maʼlumot qoldirgan.

Maʼlumotlarga ko‘ra, Vyacheslav Morozov 2010-yilda Estoniyaga ko‘chib kelgan. Bundan oldin u Sankt-Peterburg davlat universitetida o‘n yildan ortiqroq professor bo‘lib ishlagan.