Россияда АҚШ фойдасига жосуслик қилишда гумонланган журналист 20 йилга қамалиши мумкин. Бу ҳақда рус нашрлари тарқатган хабарларга асосланиб, BBC хабар берди.
Манбада айтилишича, The Wall Street Journal мухбири Эван Гершкович устидан суд жараёни бошланган. Бунга қадар у жосуслик айблови ортидан 15 ойдан кўпроқ ҳибсда сақлаб келинган.
Гершкович анча олдин ўз нашри учун репортаж тайёрлаётган бир пайтда Россиянинг Екатеринбург шаҳрида ҳибсга олинган. Сўнгра Москвадаги ҳибсхонага олиб келинган.
Журналистнинг иши Свердловск вилоят судида кўрилган. Жараёнларни бевосита кузатиш учун бир қанча нашрлар ходимларига рухсат берилган.
Прокурорларнинг таъкидлашича, америкалик журналист АҚШ Марказий разведка бошқармаси топшириғи билан Екатеринбург яқинидаги Россия танк ишлаб чиқариш бирлашмалари ҳақида махфий маълумотларни тўплаган. Сўнгра уларни мунтазам равишда Ғарбга узатиб келган.
Журналист Гершкович, унинг иш берувчиси ва АҚШ ҳукумати айбловни кескин рад этган. Агар журналистнинг айбдорлиги тасдиғини топса, у 20 йилга озодликдан маҳрум қилиниши мумкинлиги ҳақида хабар берилган.
Россия расмийлари журналистни айблаш учун далиллар етарли эканини билдирган. Далил сифатида журналист тайёрлаган видеоларда стратегик муҳим бино ва объектлар кўрингани, ҳарбий бинолар тасвирга олингани келтирилган.
Изоҳ (0)