AQSH mudofaa vaziri Lloyd Ostin 25-iyun kuni rossiyalik hamkasbi Andrey Belousov bilan ilk bor telefon orqali muloqot qilgani ma’lum bo‘ldi. Bu haqda Pentagon matbuot kotibi Patrik Rayder m’lum qildi.
Rossiya Mudofaa vazirligiga ko‘ra, suhbat “Amerika tomonining tashabbusi bilan” amalga oshirilgan. Ostin suhbat chog‘ida Rossiya va AQSH harbiy departamentlari uchun “aloqa kanallarini saqlab qolish” muhimligini aytgan.
Vazirlar Ukraina atrofidagi vaziyat yuzasidan fikr almashdi, — deyiladi Rossiya Mudofaa vazirligi bayonotida.
Xususan, Belousov “Ukraina Qurolli kuchlariga Amerika qurollarini yetkazib berish bilan bog‘liq vaziyatning yanada keskinlashishi xavfi”ni ta’kidlagan. Pentagon rahbari va Rossiya mudofaa vaziri (o‘sha paytda – Sergey Shoygu edi) o‘rtasidagi so‘nggi telefon suhbati 2023-yilning mart oyida bo‘lib o‘tgan.
Rossiya AQSHni Ukraina armiyasining Qrimga bergan zarbasiga aloqadorlikda aybladi
Rossiya va AQSH mudofaa vazirlari suhbati Ukraina armiyasining Sevastopolga raketa hujumi uyushtirgani, Kreml bunda Vashingtonni ayblagani fonida bo‘lib o‘tdi.
Anneksiya qilingan Qrimning Sevastopol shahrida 23-iyun kuni raketa hujumi yuz berdi. Oqibatda 4 kishi, jumladan, ikki bola halok bo‘ldi. 150 dan ortiq kishi jarohatlandi.
“AQSHning jangovar harakatlarda ishtirok etishi, buning natijasida rossiyalik tinch aholi halok bo‘lishi, albatta, oqibatlarsiz kechmaydi. Qandayligini vaqt ko‘rsatadi”, — degan edi Kreml matbuot kotibi Dmitriy Peskov.
Rossiya Tashqi ishlar vazirligi Oq uyning Ukraina armiyasi tomonidan Amerikaning kassetali kallaklarga ega ATACMS raketalari yordamida Sevastopolga uyushtirilgan hujumga aloqadorligini maʼlum qildi. Ayblovlarga javoban Pentagon Ukraina rasmiylari zarbalar uchun nishonlarni mustaqil tanlashini bildirdi.
Izoh (0)