Anneksiya qilingan Qrimning Sevastopol shahrida 23-iyun kuni raketa hujumi oqibatida to‘rt kishi halok bo‘ldi, 144 kishi jarohatlandi. Bu haqda Rossiya tomonidan tayinlangan Sevastopol ma’muriyati rahbari Mixail Razvojayev xabar berdi.
Rossiya havo hujumidan mudofaa tizimi to‘rtta raketani urib tushirgan, beshinchisi trayektoriyadan chetlashib, kallak qismi portlagan. Uning parchalari yuzlab odam dam olayotgan plyajga tushgan. Rossiya Mudofaa vazirligi Ukraina kassetali kallaklar bilan jihozlangan ATACMS raketalari bilan fuqarolik infratuzilmasini o‘qqa tutganini da’vo qilmoqda. Raketa qoldiqlari plyaj zonasiga, shu jumladan Uchkuyevka va Lyubimovka rayoniga tushgan.
Rossiya Tergov qo‘mitasining Bosh tergov boshqarmasi 205-modda (terrorchilik akti) bo‘yicha jinoiy ish qo‘zg‘atgan. Mudofaa vazirligi Sevastopolga hujum uchun mas’uliyatni AQSH va Ukrainaga yuklab, sodir bo‘lgan voqea javobsiz qolmasligini bildirgan. Rossiya tomonidan bosib olingan Qrimda 24-iyun motam kuni deb e’lon qilindi. Putin qurbonlarning oila a’zolariga hamdardlik bildirdi.
Izoh (0)