АҚШ мудофаа вазири Ллойд Остин 25 июнь куни россиялик ҳамкасби Андрей Белоусов билан илк бор телефон орқали мулоқот қилгани маълум бўлди. Бу ҳақда Пентагон матбуот котиби Патрик Райдер мълум қилди.
Россия Мудофаа вазирлигига кўра, суҳбат “Америка томонининг ташаббуси билан” амалга оширилган. Остин суҳбат чоғида Россия ва АҚШ ҳарбий департаментлари учун “алоқа каналларини сақлаб қолиш” муҳимлигини айтган.
Вазирлар Украина атрофидаги вазият юзасидан фикр алмашди, — дейилади Россия Мудофаа вазирлиги баёнотида.
Хусусан, Белоусов “Украина Қуролли кучларига Америка қуролларини етказиб бериш билан боғлиқ вазиятнинг янада кескинлашиши хавфи”ни таъкидлаган. Пентагон раҳбари ва Россия мудофаа вазири (ўша пайтда – Сергей Шойгу эди) ўртасидаги сўнгги телефон суҳбати 2023 йилнинг март ойида бўлиб ўтган.
Россия АҚШни Украина армиясининг Қримга берган зарбасига алоқадорликда айблади
Россия ва АҚШ мудофаа вазирлари суҳбати Украина армиясининг Севастополга ракета ҳужуми уюштиргани, Кремль бунда Вашингтонни айблагани фонида бўлиб ўтди.
Аннексия қилинган Қримнинг Севастопол шаҳрида 23 июнь куни ракета ҳужуми юз берди. Оқибатда 4 киши, жумладан, икки бола ҳалок бўлди. 150 дан ортиқ киши жароҳатланди.
“АҚШнинг жанговар ҳаракатларда иштирок этиши, бунинг натижасида россиялик тинч аҳоли ҳалок бўлиши, албатта, оқибатларсиз кечмайди. Қандайлигини вақт кўрсатади”, — деган эди Кремль матбуот котиби Дмитрий Песков.
Россия Ташқи ишлар вазирлиги Оқ уйнинг Украина армияси томонидан Американинг кассетали каллакларга эга ATACMS ракеталари ёрдамида Севастополга уюштирилган ҳужумга алоқадорлигини маълум қилди. Айбловларга жавобан Пентагон Украина расмийлари зарбалар учун нишонларни мустақил танлашини билдирди.
Изоҳ (0)