Dunyodagi eng yirik aviatashuvchi kema USS Gerald R. Ford Antaliyaga keldi. Bu haqda AQSHning Turkiyadagi elchixonasi ma’lum qildi.
Qayd etilishicha, AQSH Harbiy-dengiz kuchlari aviatashuvchisi 4 500 nafar ekipaj aʼzosi bilan Antaliya portiga yetib kelgan.
Turkiya porti kemaning AQSH dengiz operatsiyalari mintaqasidagi (NAVEUR) to‘rtinchi bekati bo‘lib, tashrif AQSH va Turkiya o‘rtasidagi hamkorlikni mustahkamlaydi. Bunga qadar USS kemasi Norvegiya, Xorvatiya, Gretsiyaga to‘xtab o‘tgan.
Avvalroq Turkiya Harbiy-dengiz kuchlarining Anadolu, Go‘ksu, Gediz, Imbat, Meltem, Burakreis kemalari va Harbiy-havo kuchlarining F-16, KC-135, P-72 samolyotlari Amerika kemasi bilan bir qator muvofiqlashtirilgan tadbirlarni amalga oshirgan edi.
“Mashg‘ulotlar hamkorlarning o‘zaro muvofiqligini oshirish va O‘rta Yer dengizida xavfsizlikni ta’minlashga sodiqlikni namoyish etish maqsadida o‘tkazildi”, — deyiladi xabarda.
Elchixonaning taʼkidlashicha, AQSH Harbiy-dengiz kuchlari Turkiya bilan muntazam ravishda mashg‘ulotlar olib bormoqda, aviatashuvchidan avval AQSH Oltinchi flotining USS Mount Whitney qo‘mondonlik kemasi Istanbulga, boshqariladigan raketa kreyseri USS Normandy esa Aksazga kelgan.
Izoh (0)