Isroil kuchlari 21-iyun Xalqaro Qizil Xoch tashkilotining G‘azodagi idorasiga hujum uyushtirishi oqibatida 22 kishi halok bo‘lgan. Bu haqda tashkilot mutasaddilari bergan maʼlumotga asoslanib, BBC xabar berdi.
Manbada aytilishicha, Isroil qo‘mita binosida HAMAS askarlari yashiringanini sabab qilib, unga hujum uyushtirgan. Oqibatda unda boshpana saqlab kelayotgan tinch aholi vakillari hujumda halok bo‘lgan.
“Og‘ir kalibrli raketalar juma kuni tushdan keyin Xalqaro Qizil Xoch qo‘mitasi idorasi va qarorgohlaridan bir necha metr masofaga kelib tushgan”, — deyiladi qo‘mita bayonotida.
Hujum hududida halok bo‘lgan 22 kishi mahalliy shifoxonaning qurbonlar bo‘limiga olib ketilgan. Qizil Xoch qo‘mitasi jarohatlanganlar soni 45 kishiga yetganini maʼlum qilgan.
“Biz gumanitar yordam va tinch aholi hayotini xavf ostiga qo‘yuvchi bu hodisalarni qoralaymiz”, — deyiladi Xalqaro Qizil Xoch tashkiloti maxsus bayonotida.
G‘azo Sog‘liqni saqlash vazirligi ham hodisa yuzasidan qisqa bayonot bergan. Unda hujum oqibatida 25 kishi halok bo‘lgani va 50 kishi jarohatlangani aytilgan.
Izoh (0)