Belgiyaning Yevropa Ittifoqidagi vakolatxonasi maʼlum qilishicha, YI kengashi Ukraina va Moldova bilan ittifoqqa qo‘shilish bo‘yicha muzokaralar boshlanishini 25-iyunga belgilagan. Avvalroq Moldova prezidenti Mayya Sandu muzokaralarni boshlash haqidagi farmonni imzolagan edi.
“Yevropa Ittifoqi kengashi tashkilotning umumiy pozitsiyalarini, jumladan, Ukraina va Moldovaning qo‘shilishi bo‘yicha muzokaralar asosini maʼqulladi. Bu 25-iyun, seshanba kuni muzokaralar boshlanishiga yo‘l ochadi”, — deb xabar qildi vakolatxona X ijtimoiy tarmog‘ida.
Materialda aytilishicha, muzokaralar Lyuksemburgda bo‘lib o‘tadi.
Ukraina va Moldova 2022-yil iyun oyida aʼzolikka nomzod davlatlar maqomini olgandi. Yevrokomissiya ularni korrupsiyaga qarshi kurash va sud-huquq islohotlarini amalga oshirishga chaqirdi, chunki YIga kirish mezonlari erkinlik, inson huquqlarini hurmat qilish va qonun ustuvorligi tamoyillariga rioya qilishni talab qiladi.
Bugun, 21-iyun kuni Maya Sandu barcha tavsiyalar bajarilganini e'lon qildi. Shuningdek, u Moldovaning YIga kirishi bo‘yicha muzokaralarni boshlash to‘g‘risidagi farmonni imzoladi. Ukraina prezidenti Vladimir Zelenskiy muzokaralar jarayoni boshlanishi haqida hozircha izoh bermadi.
Izoh (0)