Xitoy hukumati uyg‘ur qishloqlari va shaharlarining nomlarini ommaviy ravishda o‘zgartirishda davom etmoqda. Shinjondagi repressiv siyosatning bir qismi sifatida 630 ga yaqin nomi o‘zgargan joylar aniqlandi. Bu haqda Human Rights Watch’ga tayanib, The Guardian xabar berdi.
Ma’lum qilinishicha, diniy va madaniy yodgorliklarga ishora qiluvchi nomlar kommunistik partiya mafkurasini aks ettiruvchi nomlarga o‘zgartirilmoqda. Hukumat uyg‘ur respublikalari yoki 1949-yilgacha mavjud bo‘lgan rahbarlar nomini ham o‘zgartirgan. Yangi qishloqlarning nomlari odatda xitoy tilining mandarin dialektida yoziladi.
Human Rights Watch’ning Osiyo bo‘yicha direktori Eleyn Pirson bu harakatlar uyg‘urlarning madaniy o‘ziga xosligini yo‘q qilish va diniy erkinlikni bostirishga qaratilganini aytdi. Uyg‘ur inson huquqlari himoyachisi Rayhan Asat o‘zgarishlar nafaqat tarixiy obidalarni, balki uyg‘ur xalqining ijtimoiy-madaniy aloqalarini ham yo‘q qilishini ta’kidladi.
Ularning qishloqlari nomlari nafaqat tarixiy yodgorlik, balki jamiyat rishtalari, o‘ziga xos shahar madaniyati va qadriyatlarini ham ifodalaydi. Davlat tomonidan nomlarni o‘chirish va almashtirish siyosati tariximiz, madaniyatimiz va sivilizatsiyamizdan ajratishga qaratilgan, — dedi u.
Izoh (0)