AQSH sobiq prezidenti Donald Tramp kollejlarni bitirgan xorijlik talabalarga grin-karta berish g‘oyasini ilgari surdi. Bu haqda Reuters xabar berdi.
“Ular bu mamlakatda qolishlari uchun diplomlarining bir qismi sifatida avtomatik ravishda grin-karta olishlari kerak. Men eng yaxshi kollejni bitirgan va bu yerda qolishni juda xohlayotgan odamlar hikoyasini bilaman, ularda reja, konsepsiya bor edi. Ular buni amalga oshira olmaydi. Kimdir o‘qishni yaxshi natijalar bilan tamomlaydi, lekin ular hatto kompaniya bilan shartnoma tuza olmaydi, chunki mamlakatda qolishlari mumkin deb o‘ylashmaydi”, — dedi u.
Trampning so‘zlaridan uning taklifi mamlakatga noqonuniy kelganlarga ham tegishlimi yoki yo‘qmi, aniq emas. Biroq u avval ham noqonuniy migratsiya haqidagi keskin qarashlarini bir necha bor bildirgandi.
Grin-karta doimiy yashash kartasi sifatida ham tanilgan bo‘lib, shaxslarga AQSHda doimiy istiqomat qilish, ishlash huquqini beradi va fuqarolik olish sari qadamdir.
Izoh (0)