Janubiy Xitoy dengizida 19-iyun kuni Xitoy va Filippin askarlari to‘qnashuvi yuz bergan. Bu haqda Janubi-sharqiy Osiyo manbalariga asoslanib, BBC nashri xabar berdi.
Voqea haqida dastlab Filippin harbiy qo‘mondonligi xabar bergan. Keskinlik Janubiy Xitoy dengizining bahsli hududida ro‘y bergan.
Qilich, nayza va pichoqlar bilan qurollangan Xitoy qirg‘oq qo‘riqlash xodimlari Filippin askarlariga hujum qilgan. Xitoy kemalari Filippin nazorat qayiqlariga hujum qilishi ortidan qayiqlardagi qurollar tortib olingan.
To‘qnashuv yuz bergan hududda Filippin dengiz floti va qirg‘oq qo‘riqlash xizmati Ikkinchi Tomas Shoal bazasida joylashgan filippinlik qo‘shinlarga yuk yetkazib berayotgan bo‘lgan. Bu paytda Xitoy kemalari paydo bo‘lib, yuklarni to‘xtatishga uringan.
Hodisa oqibatida bir nafar Filippin askari o‘rta darajada jarohat olgan. Halok bo‘lganlar haqida maʼlumot berilmagan.
Filippin hukumati Xitoy harakatini qaroqchilik deya baholagan. Janubiy Xitoy dengizida patrullik qilish uchun Xitoyda hech qanday huquq yo‘qligi maʼlum qilingan.
“Ularda bizning vositalarimizni o‘g‘irlash, eksklyuziv iqtisodiy zonamizda ishlaydigan Filippin kemalarini yo‘q qilish huquqi yoki qonuniy vakolat yo‘q”, — deyiladi Filippin bayonotida.
Xitoy rasmiylari hodisa yuzasidan munosabat bildirgan. Pekin askarlari faqatgina “noqonuniy yuk tashish”ning oldini olishga harakat qilgani xabar qilingan.
“Xitoy qirg‘oq qo‘riqlash xizmati tomonidan voqea joyida ko‘rilgan huquqni muhofaza qilish choralari professional va vazmin tarzda olib borilgan”, — deyiladi Xitoy Tashqi ishlar vazirligi xabarida.
Xitoy Filippin kemalari xavfli tarzda hududdagi Pekin kontingentiga yaqinlashganini aytgan. Ushbu holat muntazam takrorlana boshlagach esa Pekin keskin qaror qabul qilgan.
Xitoy o‘z askarlari xatti-harakati keskinlik yuzaga keltirishni maqsad qilmagani ifodasi sifatida to‘qnashuv paytida ibtidoiy qurollardan foydalanilganini aytgan. Filippin tomonidan ushbu turdagi provokatsiya davom etsa, o‘t ochar qurollarga ruxsat berilishi bildirilgan.
Izoh (0)