AQSH hukumati Keniyadagi Jahon oziq-ovqat dasturi doirasida kambag‘al aholiga yordam ko‘rsatish uchun 37 million dollar ajratgan. Bu haqda Anadolu nashri xabar berdi.
Manbada aytilishicha, ajratilgan mablag‘ asosan qochqinlar va ko‘chirilganlar uchun sarflanadi. So‘nggi yillarda qo‘shni mamlakatlarda yuz bergan harbiy mojarolar sharoitida Keniya hududiga bir necha yuz ming qochqin kirib kelgan.
Keniyadagi oziq-ovqat dasturi bosh departamenti AQSH yordamini qabul qilganini tasdiqlagan. Ushbu mablag‘ BMT nazorati ostida taqsimlanishi maʼlum qilingan.
Jahon oziq-ovqat dasturining Sharqiy Afrika davlati bo‘yicha direktori Loren Landis mablag‘ tasarrufi haqida qisqa bayonot eʼlon qilgan. AQSH yordami Jahon oziq-ovqat dasturi doirasida Keniya qochqinlar lagerlarida kunlik oziq-ovqat ratsionini oshirish va 2024-yilgacha ikkita lager hududida naqd pul ko‘rinishidagi yordam tashabbusini amalga oshirish uchun sarflanishi aytilgan.
“Qochqin oilalar so‘nggi ikki oyni juda qiyin o‘tkazdilar. Hozirda ularning yashab qolishi uchun zarur bo‘lgan minimal oziq-ovqat hajmining yarmigina bizda mavjud”, — degan Landis.
Manbada aytilishicha, Dadaab va Kakumaba lagerlarida moliyaviy yordam hisobidan rag‘bat tizimi joriy qilinadi. Aholini mehnatga jalb qilish dasturi ishlab chiqariladi.
Hozirda Keniya hududidagi ikkita qochqinlar lagerida 580 ming kishi boshpana saqlamoqda. Ushbu lagerlarga yordam o‘tkazmalari may oyida to‘xtab qolgan edi,naqd pul o‘tkazish may oyida vaqtincha to‘xtatilgan edi.
Maʼlumotlarga ko‘ra, Keniyada 2019-yildan beri qochqinlar va boshpana izlovchilar soni 60 foizga ko‘paygan. Qochqinlarning aksariyati Somali, Janubiy Sudan va Kongo Demokratik Respublikasidan kirib kelgan. Aholi ko‘chishining bosh omili qo‘shni mamlakatlardagi mojarolar va fuqarolar urushi ekanligi aytilgan.
Izoh (0)