Жанубий Хитой денгизида 19 июнь куни Хитой ва Филиппин аскарлари тўқнашуви юз берган. Бу ҳақда Жануби-шарқий Осиё манбаларига асосланиб, BBC нашри хабар берди.
Воқеа ҳақида дастлаб Филиппин ҳарбий қўмондонлиги хабар берган. Кескинлик Жанубий Хитой денгизининг баҳсли ҳудудида рўй берган.
Қилич, найза ва пичоқлар билан қуролланган Хитой қирғоқ қўриқлаш ходимлари Филиппин аскарларига ҳужум қилган. Хитой кемалари Филиппин назорат қайиқларига ҳужум қилиши ортидан қайиқлардаги қуроллар тортиб олинган.
Тўқнашув юз берган ҳудудда Филиппин денгиз флоти ва қирғоқ қўриқлаш хизмати Иккинчи Томас Шоал базасида жойлашган филиппинлик қўшинларга юк етказиб бераётган бўлган. Бу пайтда Хитой кемалари пайдо бўлиб, юкларни тўхтатишга уринган.
Ҳодиса оқибатида бир нафар Филиппин аскари ўрта даражада жароҳат олган. Ҳалок бўлганлар ҳақида маълумот берилмаган.
Филиппин ҳукумати Хитой ҳаракатини қароқчилик дея баҳолаган. Жанубий Хитой денгизида патруллик қилиш учун Хитойда ҳеч қандай ҳуқуқ йўқлиги маълум қилинган.
“Уларда бизнинг воситаларимизни ўғирлаш, эксклюзив иқтисодий зонамизда ишлайдиган Филиппин кемаларини йўқ қилиш ҳуқуқи ёки қонуний ваколат йўқ”, — дейилади Филиппин баёнотида.
Хитой расмийлари ҳодиса юзасидан муносабат билдирган. Пекин аскарлари фақатгина “ноқонуний юк ташиш”нинг олдини олишга ҳаракат қилгани хабар қилинган.
“Хитой қирғоқ қўриқлаш хизмати томонидан воқеа жойида кўрилган ҳуқуқни муҳофаза қилиш чоралари профессионал ва вазмин тарзда олиб борилган”, — дейилади Хитой Ташқи ишлар вазирлиги хабарида.
Хитой Филиппин кемалари хавфли тарзда ҳудуддаги Пекин контингентига яқинлашганини айтган. Ушбу ҳолат мунтазам такрорлана бошлагач эса Пекин кескин қарор қабул қилган.
Хитой ўз аскарлари хатти-ҳаракати кескинлик юзага келтиришни мақсад қилмагани ифодаси сифатида тўқнашув пайтида ибтидоий қуроллардан фойдаланилганини айтган. Филиппин томонидан ушбу турдаги провокация давом этса, ўт очар қуролларга рухсат берилиши билдирилган.
Изоҳ (0)