“Daryo” nashriga “Xorazm yo‘lovchi tashishni monitoring va nazorat qilish” davlat muassasasining 25 nafar xodimi 6 oydan buyon oylik ololmayotgani haqida murojaat kelib tushgan edi.
Holat yuzasidan Xorazm viloyati transport boshqarmasi izoh berdi.
O‘zbekiston prezidentining 2024-yil 25-martdagi “Jamoat transportini moliyalashtirish tizimini takomillashtirish bo‘yicha qo‘shimcha chora-tadbirlar to‘g‘risida”gi qarori bilan mazkur davlat muassasasining funksiya va vazifalariga o‘zgartirishlar kiritilgan hamda joriy yilning 1-may sanasidan “Xorazm yo‘lovchi tashishni monitoring va nazorat qilish” davlat muassasasining tashkiliy tuzilmasi qayta tasdiqlandi.
Bugungi kunda, tasdiqlangan shtat jadvaliga asosan “Xorazm Yo‘lovchi tashishni monitoring va nazorat qilish” davlat muassasasi xodimlarining oylik maoshlarini to‘lab berish maqsadida Transport vazirligi, Moliya vazirligi hamda viloyat moliya boshqarmasi bilan amaliy ishlar olib borilib barcha hisob-kitoblar Moliya vazirligiga taqdim qilingan, — deyiladi boshqarma axborotida.
Qo‘shimcha qilinishicha, joriy yilning iyun oyi yakuniga qadar barcha xodimlarga yanvar-may oylaridan bo‘lgan oylik maoshidan qarzdorligi hamda iyun oyi oylik maoshi bo‘yicha hisob-kitoblar to‘liq to‘lab beriladi.
Izoh (0)