Enter Engineering kompaniyasi kechikayotgan maoshini talab qilgan ishchilarini bo‘shatishni boshlagani haqida xabar berilgandi. Mazkur masala jamoatchilikka ochiqlangach, kompaniya ishchilariga maosh berila boshlandi. Bu haqda “Daryo”ga maosh ola boshlagan ishchilar xabar berdi.
Ishchilarning ma’lumot berishicha, berilayotgan maosh noyabr oyi uchun avans pullari bo‘lishi mumkin.
O‘zimiz ham anig‘ini bilmaymiz, shunaqa haqqimizni talab qilib, ofisga borsak, tinchlanib turishsin deyishadimi, arzimagan 1,5 million so‘mdan 1,7 million so‘mgacha plastik kartochkaga pul berib qo‘yishadi. Lekin oylikni to‘liq ololmaymiz, — deydi ismi sir qolishini so‘ragan ishchi.
Kecha, 12-dekabr kuni kompaniyaning Boysun tumanidagi Boysun gazni qayta ishlash zavodida faoliyat yuritayotgan yuzlab ishchilar rahbariyatga murojaat qilib, maoshini talab qilgandi.
Ishxonadan oylik so‘rab, Telegram’dagi guruhga yozgandim. Guruhdagilarga boshliqlardan kechikayotgan oyligimizni so‘raylik, borib haqqimizni talab qilaylik deb, yozgandim. Buni ko‘rib qolgan boshliqlar o‘zimizning nomimizdan hech qanday e’tirozimiz yo‘q, o‘z xohishimiz bilan bo‘shayapmiz deb, ariza yozdirib olishdi. Va ishdan bo‘shatib yuborishdi, — deydi ishdan haydalganini aytgan xodim.
Tahririyatga yuborilgan videolarda ta’kidlanishicha, rahbariyati bilan ko‘rishgan ishchilar “Ish tashlaymiz, oylik yo‘q, oylik qani?”, — deya savol bergan.
“Daryo”ga video yuborgan yana bir ishchining bildirishicha, zavod xodimlarining talabidan so‘ng, rahbariyat vakillari ular bilan uchrashgan va ishchilar maoshi qachon berilishiga qisman oydinlik kiritgan.
“Cho‘ntagimizga qarab beramiz”, — deydi holatdan norozi mas’ul. Va uning bu gapini tasvirga olayotgan ishchiga e’tiroz bildirib, “o‘chir telefoningni”, deya qo‘shimcha qiladi.
Faoliyatini 2012-yilda boshlab, “Eng taraqqiy etayotgan kompaniyalardan biri” deya o‘ziga ta’rif bergan Enter Engineering kompaniyasi minglab ishchilariga uch-to‘rt oydan buyon maosh bermayotgani xabar qilingandi.
Kompaniya mas’uli “Daryo”ning ishchilar maoshi o‘z vaqtida berilmasligi sababini bilishga qiziqqanida, savolga hech qanday izoh bermagandi. Mazkur muammoga Kambag‘allikni qisqartirish va bandlik vazirligi ham e’tibor qaratgan. Ammo hozircha vazirlik mas’ullari ham bu borada ma’lumot bermadi.
Izoh (0)