14-may kuni “Daryo”da “Oyliksiz qolayotgan o‘yinchilar, taʼmiri tugamayotgan maydon — o‘z holiga tashlab qo‘yilgan ‘Dinamo’ ” sarlavhali maqola e’lon qilindi. Unda jurnalist klubning moliyaviy ahvoli va klubni qiynayotgan muammolar yuzasidan Vadim Abramov fikrlari bilan qiziqqan edi.
Klub matbuot bo‘limining rasmiy munosabatiga ko‘ra, bugun, 15-may sanasidan futbolchilarga oylik maosh to‘lanayotgani bildirilgan. Jamoani qiynayotgan boshqa muammolar ham hal qilinayotgani ma’lum qilindi.
Jamoa oldidagi muammolar rahbariyat tomonidan birin-ketin hal qilinmoqda. “Dinamo” PFK jamoasida bugundan oylik maoshlar berilyapti.
Shuningdek, “Dinamo” markaziy o‘yingohini Superliga va xalqaro uchrashuvlarni o‘tkazishga tayyorlash maqsadida “Nasaf Megastroy” MChJ tomonidan ishlar amalga oshirilmoqda, deya qo‘shimcha qilgan matbuot xizmati kotibi.
Futbol maydoniga drenaj tizimini o‘rnatish, sug‘orish tizimini modernizatsiya qilish hamda yoritish tizimini kuchaytirish va chim qoplamasini yotqizish ishlari bajarilgan. Ayni vaqtda stadionning yugurish yo‘laklariga asfalt yotqizish ishlari ham amalga oshirilib, ishlar yakunlanish arafasida.
Samarqand shahridagi “Afrosiyob Arena” stadionini ham standart holatga keltirish borasida mutasaddilar tomonidan tegishli ishlar boshlangani haqida ham matbuot xizmati xabarida ma’lumot berilgan.
Eslatib o‘tamiz:
- “Dinamo” klubi bosh murabbiyi Vadim Abramov futbolchilar salkam 4 oydan buyon maosh olmayotganini aytib o‘tgandi.
- “Dinamo” klubi 20-may kuni “Paxtakor” klubini qabul qiladi.
- Ijtimoiy tarmoqlarda ushbu o‘yin Samarqandda bo‘lishi haqida xabarlar tarqalmoqda.
- PFL bu haqda rasman hech qanday ma’lumot berganicha yo‘q.
Izoh (0)