“Uyda yolg‘iz” komediyasida bosh qahramon Kevin Makkallisterning oilasi yashagan uy o‘z xaridorini topdi. Bu haqda “Pravila jizni” nashri xabar berdi.
Chikago chekkasidagi Vinnetka qishlog‘ida joylashgan qariyb 850 metr kvadrat maydonga ega ikki qavatli g‘ishtin uy 5,25 million dollarga baholangan edi.
Uy sotilishi haqidagi e’lon 24-may kuni chiqdi, 31-mayda esa xabarning kategoriyasi “ehtimol sotiladi”ga o‘zgartirildi. 9-iyun kuni xaridor uyni to‘liq sotib olishga qaror qildi.
Hozircha uy oldi-sotdisi haqidagi shartnoma hujjatlari ommaga e’lon qilinmagan. Shuningdek, bitimning aniq summasi va xaridorning shaxsi oshkor etilmagan.
Makkallisterlar uyi 1990-yildagi film muvaffaqiyatidan keyin ikkinchi marta sotuvga qo‘yilgan. 2012-yilda uy 1,58 million dollarga sotilgan. Xaridor topilishiga bir yil vaqt ketgan.
Ko‘chmas mulk ikkita mehmonxona, beshta yotoqxona va oltita yuvinish xonasidan iborat. Uyning interyeri filmdagi xonadondan ancha yiroq, chunki uning egalari 2018-yilda uyni to‘liq zamonaviy ta’mirdan chiqargan.
Izoh (0)