Namangan shahrida yashovchi 35 yoshli T.R. ichki ishlar organlariga ariza bilan murojaat qilib, nomaʼlum sabablarga ko‘ra uning nomiga 20 mln so‘m onlayn kredit rasmiylashtirilganligini va aybdor shaxsga qonuniy chora ko‘rilishini so‘ragan. Bu haqda Kiberxavfsizlik markazi xabar berdi.
Maʼlum qilinishicha, o‘tkazilgan tezkor-qidiruv tadbirlari natijasida mazkur jinoyatni Namangan viloyatida yashovchi T.D. sodir etganligi aniqlandi.
Unga ko‘ra, gumonlanuvchi T.D. jabrlanuvchi T.R.ga soxta havola yuborish orqali shaxsiy maʼlumotlarini qo‘lga kiritib, uning bank mobil ilovasiga ikkinchi foydalanuvchi sifatida ulanib, uning nomidan 20 mln onlayn kredit rasmiylashtirib, mazkur pullarni o‘zining foydalanuvida bo‘lgan bank plastik kartasiga o‘tkazib olgan va o‘z ehtiyojlariga sarflab yuborganligi maʼlum bo‘ldi.
Mazkur holat yuzasidan T.D.ga nisbatan JKning 169-moddasi (o‘g‘rilik) 3-qismi “b” bandi bilan jinoyat ishi qo‘zg‘atilgan.
Izoh (0)