Germaniya hukumati Rossiyaga nisbatan sanksiyalarni chetlab o‘tishni qiyinlashtirishga qaratilgan jazo choralarining qabul qilinishiga qarshi chiqmoqda, deya Deutsche Welle xabar berdi.
Xabarga ko‘ra, sanksiyalar G7 sammiti boshlanishiga qadar tasdiqlanishi kerak edi. Yangi paket Rossiya-Ukraina urushi sababli Moskvaga nisbatan joriy qilingan mavjud cheklovlarni chetlab o‘tishga yo‘l qo‘ymaslik uchun ishlab chiqilgan.
DPA suhbatdoshlariga ko‘ra, Germaniyaning ikkilanishi va hujjat matniga o‘zgartirish kiritish haqidagi iltimoslari Rossiyaga qarshi so‘nggi sanksiyalar paketini kechiktirishning hal qiluvchi omilidir.
So‘nggi paytlarda Germaniya — yangi Vengriya, degan o‘ylar paydo bo‘ldi, ya’ni Viktor Orban hukumati Rossiyaga qarshi Yevropa sanksiyalarini qabul qilish va Ukrainaga yordam ko‘rsatishni bir necha bor to‘sib qo‘ygan edi, — dedi YI diplomatlaridan biri.
Germaniyaning YIdagi doimiy vakolatxonasi vakili muzokaralar maxfiy o‘tganini aytib, tafsilotlar haqida izoh berishdan bosh tortgan.
Nashr suhbatdoshlariga ko‘ra, Berlin asosan Rossiyaga qarshi mavjud sanksiyalarni chetlab o‘tishni murakkablashtirishga qaratilgan chora-tadbirlarga to‘sqinlik qilmoqda.
Germaniya ayrim tovarlarga nisbatan sanksiyalar buzilgan taqdirda sho‘ba korxonalarni javobgarlikka tortish to‘g‘risidagi bandni cheklash yoki hatto yo‘q qilishga chaqirmoqda, aks holda nemis kompaniyalari javobgarlikka tortilishi mumkin, — deyiladi xabarda.
Izoh (0)