Yevropa Ittifoqi Rossiyaga qarshi 11-sanksiyalar paketini qabul qildi

Yevropa Ittifoqi tomonidan 21-iyun kuni qabul qilingan Rossiyaga qarshi sanksiyalarning navbatdagi, 11-paketi kuchga kirdi. Bu haqda Estoniya Tashqi ishlar vazirligi e’lon qildi. Keyinroq Yevropa Kengashi saytida ham yangi sanksiyalar to‘plami haqida maqola paydo bo‘ldi.

Yangi cheklovlar to‘plami, kutilganidek, bunga qadar o‘rnatilgan sanksiyalarni chetlab o‘tishga qarshi choralarni o‘z ichiga oladi. Xususan, endilikda Yevroittifoqning tegishli organlari sanksiya ostidagi tovarlarning Rossiyaga uchinchi davlatlar orqali kirib borishiga qarshi taqiqlarni kengaytirishi mumkin bo‘ldi.

Yangi sanksiyalarga Rossiyaning bir qator kompaniyalari va shaxslari, shuningdek, xorijiy kompaniyalar ham kiritildi.

Jumladan, Rossiyaning axborot xavfsizligi sohasidagi eng yirik kompaniyalaridan biri Positive Technologies sanksiyalar ostida qoldi. Donetsk, Lugansk, Zaporojye va Xerson viloyatlarida ish boshlagan “Zvezda” teleradiokompaniyasi, Xalqaro hisob-kitob banki va TsMRBank ham sanksiya ro‘yxatiga kiritildi.

Yevropa Ittifoqi, shuningdek, “Drujba” quvurining shimoliy tarmog‘i orqali Rossiya neftini import qilishni taqiqladi.

YI Rossiyadan tirkamalar va yarim tirkamalarni olib kirishni butunlay taqiqladi va ikki tomonlama maqsadli ayrim tovarlarni (jumladan, ilg‘or texnologiyalar, aviatsiya materiallari) Rossiya orqali tranzit qilish taqiqini kengaytirdi.

Bundan tashqari, hashamatli avtomobillar eksportiga taqiq barcha elektr va gibrid modellarga nisbatan joriy qilindi. Rossiya metallidan tayyorlangan po‘lat buyumlar va mahsulotlarini YIga a’zo mamlakatlarga import qilish taqiqlandi.

Ko‘plab rossiyaliklar, jumladan, Rossiyaning bir qancha viloyatlari gubernatorlari ham cheklov choralariga tushib qoldi.

Bir qator xorijiy kompaniyalar ham sanksiyalar ostida qoldi: Armanistonning TakoLLC, O‘zbekistonning ikkita kompaniyasi (Alfa Beta Creative LLC va GFK Logistics Asia LLC), Birlashgan Arab Amirliklarining ikkita kompaniyasi (Success Aviation Services FZC va I Jet Global DMCC), Suriyaning I Jet Global DMCC kompaniyasi va Eronning 8 ta kompaniyasi. Bundan tashqari, YI Gonkongning uchta kompaniyasiga sanksiya joriy qildi: Asia Pacific Links Ltd., Tordan Industry Limited va Alpha Trading Investments Limited.