Uels malikasi Keyt intervyularida har doim gapiradigan oshpazlik va bog‘dorchilikdan tashqari yana ko‘plab yashirin iste’dodlarga ega. Masalan, asalarichilik.
Asalarichilik
Ukasi Jeyms Middlton singari Keyt ham asalarichi bo‘lib, matbuot xabarlariga ko‘ra hatto qirollik tashrifi chog‘ida mehmonlarni bog‘idagi asal bilan siylagan. 2021-yilda Janubiy Kensingtondagi Tabiiy tarix muzeyiga tashrif buyurgan Keyt Norfolkdagi uyida asalarilari borligini ma’lum qiladi. Tashrif chog‘ida u Norfolk bog‘idan bir banka asal olib keladi va uni Londondagi Sent-Meri of Angels boshlang‘ich maktabidagi bolalarga hadya qiladi.
Uelsning Berkshirda yashovchi ukasi Jeymsning ham bir nechta asalari uyalari bor — u sevimli mashg‘uloti unga depressiyani yengishga yordam berishini aytgan. Bu ishtiyoq 2011-yilda Jeymsning ota-onasi va opalari — Keyt va Pippa unga tug‘ilgan kunida birinchi asalarilari qutilarini sovg‘a qilishganida boshlangan. Natijada uning sevimli mashg‘ulotiga katta opasi ham qiziqib qoladi.
Rasm chizish
Keyt farzandlarini o‘zi suratga olishi va hatto o‘tgan yili Country Life muqovasi uchun qirolicha Kamillani suratga olgani bilan mashhur bo‘ldi (Yelizavetta va Filippning shov-shuvli suratlari haqida gapirmasa ham bo‘ladi)). Biroq Ketrin haqiqatan ham ko‘proq badiiy mahoratga ega, jumladan, rasm chizishni yaxshi ko‘radi. Uning ijodga bo‘lgan qiziqishi u Sent-Endryus universitetini san’at tarixi bo‘yicha tamomlaganida boshlangan.
Keyt nafaqat bolalarini suratga oladi, balki ularni chizadi ham. 2015-yilda malikaning do‘stlari Daily Mail nashriga Keyt yozni Norfolkda shahzoda Jorj va malika Sharlotta (uning kenja o‘g‘li, shahzoda Lui hali tug‘ilmagan) rasmini chizganini aytishgan. Aytishlaricha, shahzoda Jorjga onasining bu iste’dodi meros bo‘lib o‘tgan.
Eshkak eshish
Shahzoda Uilyam rafiqasining sport qobiliyatlari voleybol o‘ynashdan o‘q otishgacha yaqqol namoyon bo‘lgan bo‘lsa-da, malikaning unchalik mashhur bo‘lmagan iste’dodi shundaki, u bir vaqtlar eshkak eshish bilan shug‘ullangan. U hatto 2007-yilda Channel Race’da ishtirok etgan ham. Keyt 21 a’zodan iborat “Opa-singillar” jamoasining a’zosi bo‘lgan. Afsuski, Bukingem saroyi bunga qarshi chiqqanidan keyin u poygada qatnashmaydi. O‘sha paytda qirollik eksperti Richard Kayning aytishicha, qirollik oilasi malikaning bu mashg‘uloti ommaviy axborot vositalarining g‘azabiga sabab bo‘lishidan qo‘rqishgan.
Dayving (sho‘ng‘ish)
2015-yilda Kembrij gersoginyasi yangi sport turi bilan shug‘ullanib, 30 metr chuqurlikka sho‘ng‘ish imkonini beruvchi dayving bo‘yicha professional sho‘ng‘ish o‘qituvchilari uyushmasi (PADI) sertifikatini qo‘lga kiritadi. Bu eng ilg‘or dayving malakalaridan biridir.
Taxt vorisi shahzoda Uillyam ham ko‘p yillar davomida g‘avvoslik bilan shug‘ullanib, otasi Charlzdan keyin Buyuk Britaniya g‘avvoslari yig‘ilgan Britaniya suvosti klubi prezidenti lavozimini egallagan.
Fortepiano
2021-yil dekabr oyida Keyt Vestminster abbatligidagi Rojdestvo qo‘shiqlari konsertida qo‘shiqchi Tom Uoker hamrohligidagi chiqishi bilan qirollik muxlislarini hayratda qoldiradi. Pandemiya paytida yo‘qolgan yaqinlariga bag‘ishlangan spektakl qirollik muxlislari va professional musiqachilar tomonidan olqishlarga sazovor bo‘ladi. Kembrij gersoginyasi pianinoda “Bu yerda bo‘lolmaydiganlar uchun” qo‘shig‘ini ijro etadi. Bir yil o‘tgach, Tom Uoker spektakl haqida gapirar ekan, Good Morning Britain nashriga: “U haqiqatan ham iste’dodli musiqachi”, deydi.
Ko‘rinib turibdiki, bo‘lajak malika bolaligidan musiqa va teatrga qiziqqan. 2014-yilda 11 yoshli Keyt “My Fair Lady” filmida Eliza rolini o‘ynab, Isn’t She Loverly qo‘shig‘ini ijro etgani aks etgan video paydo bo‘lgandi. Biroq malika xonandalik iste’dodi bilan faxrlanmaydi — u 2022-yilda xor konsertida yomon kuylaganini, qo‘shiq aytishni ko‘proq mashq qilishi kerakligini aytadi.
Imo-ishora tilini bilish
Joriy yilning boshida Uels malikasi Falmutdagi Kornuoll milliy dengiz muzeyiga qirollik tashrifi chog‘ida o‘zining imo-ishora tilini bilishini namoyish etdi. Kemalar poygasi oldidan qirol Charlz boshlang‘ich maktab bolalari bilan gaplashar ekan, Keyt eshitish qobiliyati past bola bilan gaplashish uchun imo-ishora tilidan foydalangan.
Uels malikasi va shahzodasi bu mahoratni birinchi marta namoyish etayotgani yo‘q. 2014-yilda Ketrin London sharqidagi mahalliy skaut klubiga tashrif buyurganida imo-ishora tilidan foydalangan. Shahzoda Uilyam ham imo-ishora tilini biladi. Shahzoda bu mahoratni bir paytlar karlar jamiyati bilan ishlagani uchun maqtovga sazovor bo‘lgan onasidan olgan bo‘lishi mumkin. Malika Diana 1983-yilda Britaniya Karlar assotsiatsiyasining homiysi bo‘lgan. U mazkur assotsiyatsiyaga o‘n yildan ortiq homiylik qiladi va 1996-yilda, Charlz bilan ajrashish yakunlanishidan bir necha oy oldin iste’foga chiqadi.
Izoh (0)