Har qanday dekorativ yoki parvarishlovchi kosmetik mahsulotning ikki xil yaroqlilik muddati bo‘ladi: ochilishdan avvalgi va ochilgandan keyingi muddat. Yaroqlilik muddati qutida yoki kosmetik vositaning yuzasida EXP: so‘zi bilan ko‘rsatiladi. Shunday kosmetikalar borki, ular 1-2 yil va hatto undan ko‘p muddat davomida saqlanishi mumkin, masalan, ko‘z uchun rangli tenlar, qattiq qalamlar yoki haylayterlar. Ammo aksariyat kosmetik mahsulotlarni saqlash muddati ancha qisqa bo‘ladi. Muddati o‘tgan bo‘yoq va atir-upadan foydalanish esa allergik reaksiyalar va turli infeksiyalar yuqtirishga sabab bo‘ladi.
Tabiiy kosmetika (Yaroqlilik muddati: 3-6 oy)
Tabiiy mahsulotlardan tayyorlangan maxsus kosmetika saqlash muddati juda qisqa bo‘ladi. Sababi, tabiiy kosmetika tarkibida sintetik konservantlar mavjud bo‘lmaydi va ular kimyoviy bo‘yoqlar kabi kuchli ta’sirga ega emas. Ochilgandan so‘ng tabiiy kosmetika 3-6 oygacha saqlanishi mumkin. Muddati tugagan mahsulotni esa tashlab yuborish kerak, chunki u nafaqat samarasiz bo‘ladi, balki allergiya qo‘zg‘atib yuboradi.
Tush (Yaroqlilik muddati: 3-6 oy)
Dekorativ kosmetikalar ichida eng tez ifloslanadigan va muddati tugaydigan mahsulot — bu ko‘zlar uchun tush. Tush ichiga doimo havo kirishi, cho‘tkasiga bakteriyalar to‘planishi ko‘zga zarar keltiradi. Shuning uchun tushning yaroqlilik muddati boshqa dekorativ mahsulotlarga qaraganda qisqaroq. Agar siz har kuni kipriklaringizni bo‘yab yursangiz, mahsulotni har uch oyda bir marta almashtirishingiz lozim. Ochilgan tush uzog‘i 6 oy saqlanadi.
Bankasimon idishdagi kremlar (Yaroqlilik muddati: 3-6 oy)
Shisha idishdagi kremlar ko‘rinishidan qanchalik chiroyli bo‘lmasin, ulardan foydalanish amalda qulay emas. Mahsulotga doim barmoq bilan tegish, tez-tez ochib turishga to‘g‘ri keladi. Krem tanlashda kosmetika dozatorli va kichik qopqoqli idishda bo‘lishiga ahamiyat bering.
Ko‘z atrofi uchun patchi (Yaroqlilik muddati: 3-6 oy)
Yopiq qadoqdagi patchilar uch yilgacha saqlanishi mumkin. Ammo ochilgan patchi xona haroratida uzog‘i 3 oy, qorong‘i va salqin joyda 6 oygacha saqlanadi. Ko‘z atrofidagi teri yuzning eng nozik va sezgir qismi bo‘lib, patchi va ko‘z atrofiga surtiladigan barcha kosmetik vositalarni saqlashda muddatga amal qilish salomatlik uchun muhim hisoblanadi.
Ko‘z uchun suyuq qalam — podvodka (Yaroqlilik muddati: 3-6 oy)
Podvodka, tush, qalam kabi ko‘z uchun bo‘yoqlar ko‘z sohasiga juda yaqin joyda qo‘llanilgani tufayli ularni muntazam ravishda — har 3-6 oyda almashtirish kerak. Qalam ko‘rinishidagi ko‘z bo‘yoqlari suyuq podvodkaga nisbatan uzoqroq saqlanadi. Chunki tarkibida suv bo‘lgan barcha mahsulotlar birinchi navbatda buziladi. Suv esa bakteriyalar va mikroblarning tarqalishi uchun qulay muhit yaratadi.
Izoh (0)