Asosiy ish faoliyatidan tashqari, Gollivud mashhurlari kosmetika loyihalariga ham katta sarmoya kiritadi. Quyida shaxsiy go‘zallik kompaniyasini tashkil etgan va o‘zining tadbirkorlik ishlari bilan yuqori daromadga chiqqan yulduzlarni e’tiboringizga havola etamiz.
Jessika Alba — Honest Beauty
Gollivud aktrisasi Jessika Albaning Honest Beauty brendi ekologik jihatdan toza go‘zallik va salomatlik mahsulotlarini o‘z ichiga oladi. Mazkur brend teri va soch parvarishi hamda dekorativ kosmetika uchun keng assortimentni taklif etadi.
Rianna — Fenty Beauty
Mashhur xonanda Rianna Fenty Beauty kosmetika brendi go‘zallik sanoatida inqilob qildi. Kompaniya turli xil teri ranglariga mos keladigan tonal kremlarning keng assortimentini taqdim etadi. Fenty Beauty o‘zining yuqori sifatli mahsulotlari tufayli qisqa vaqt ichida kosmetika sanoatda yetakchi ishlab chiqaruvchilardan biriga aylandi.
Kayli Jenner — Kylie Cosmetics
Kardashyanlar oilasining kenja a’zosi Kayli Jenner o‘zining Kylie Cosmetics brendiga asos solgan. Kompaniya ayniqsa lab bo‘yog‘i to‘plamlari bilan mashhurdir. Ushbu brend mahsulotlari butun dunyo bo‘ylab millionlab go‘zallik ixlosmandlari tomonidan sevib foydalaniladi.
Ledi Gaga — Haus Laboratories
Taniqli xonanda Ledi Gaga Haus Laboratories kompaniyasini 2019-yilda tashkil qildi. Uning mahsulotlari hozirda 10 dan ortiq davlatlarda, jumladan, Amazon savdo platformasi hamda Sephora do‘konlarida sotiladi.
Dryu Berrimor — Flower Beauty
“Charli farishtalari” filmi yulduzi, aktrisa Dryu Berrimor o‘zining kosmetika brendini 2012-yilda tashkil qildi. Uning brendi yuqori sifat va hamyonbop narxlarni o‘zida mujassam etgan.
Selena Gomes — Rare Beauty
Xonanda Selena Gomesning Rare Beauty kompaniyasi insonlarning o‘ziga xosligini qabul qilish va targ‘ib etish, soxta mukammallik standartlarini buzish hamda aholining ruhiy salomatligini oshirishni maqsad qilgan. Keng assortimentdan iborat brend turli xayriya tashabbuslarini ham qo‘llab-quvvatlaydi. So‘nggi besh yil ichida brendning umumiy daromadi 2 milliard dollardan oshdi. Rare Beauty kosmetikalari Sephora do‘konlari tarmog‘ida eng ko‘p sotiladigan mahsulotlardan biridir.
Viktoriya Bekhem — Victoria Beckham Beauty
Britaniyalik aktrisa va xonanda, Spice Girls guruhining sobiq a’zosi Viktoriya Bekhem o‘zining minimalistik estetikasini namoyish etib, 2019-yilda shaxsiy kosmetika brendini ishga tushirdi. Brend yuqori sifatli va vegetarian go‘zallik mahsulotlarini taklif etadi.
Farrel Uilyams — Humanrace Skincare
Qo‘shiqchi, reper Farrel Uilyams terini parvarish qilish vositalariga ixtisoslashgan brendini tashkil qilgan. Kompaniya tarkibiy qismlariga hayvon komponentlari qo‘shilmaydigan va ekologik jihatdan toza mahsulotlarni taklif etadi.
Ariana Grande — R.E.M. Beauty
Xonanda Ariana Grande o‘zining shaxsiy kosmetika brendini 2021-yil noyabr oyida ishga tushirdi. Qisqa vaqt ichida mashhurlikka erishgan R.E.M. Beauty kompaniyasi 2022-yil may oyida Allure’s Readers’ Choice Awards mukofotida eng yaxshi yangi brend mukofotini qo‘lga kiritdi.
Izoh (0)