Ko‘p yillar davomida kosmetika sanoatida o‘z mavqeyiga ega va millionlab ayollar tomonidan sevib ishlatiladigan mashhur kosmetika brendlari kimlar tomonidan yaratilgan? Ularning tadbirkorlik loyihalari nimadan boshlangan va qanday qilib ulkan muvaffaqiyat qozongan? Bugun mashhur go‘zallik brendlarini yaratgan shaxslar hikoyasi bilan tanishamiz.
Ejen Shueller, L’Oréal
L’Oréal brendining tarixi soch bo‘yoqlari yaratilishiga borib taqaladi. Shueller 1909-yil 30-iyulda L’Oréal nomi ostida ayollar salomatligi uchun xavfsiz soch bo‘yoqlari ishlab chiqaradigan fransuz kompaniyasiga asos soldi. So‘ng yosh kimyogar Ejen Shueller soch bo‘yash bo‘yicha kichik maktabiga asos soldi.
Birinchi jahon urushidan so‘ng kompaniyaning muvaffaqiyati oshib ketdi va L’Oréal bo‘yoqlari nafaqat Fransiyada, balki Gollandiya, Avstriya, AQSH va Buyuk Britaniya bozorlarini ham zabt eta boshladi. Kimyogarning navbatdagi yutug‘i 1925-yilda yaratilgan sochlarga tillo rang beruvchi va oqartiruvchi bo‘yoq ixtirosi bo‘ldi. Shuningdek, Shueller ayollar salomatligi va go‘zalligi haqida Votre Beauté jurnali ustida ish olib borgan.
Este Lauder, Estée Lauder
Este Lauder o‘zining tadbirkorlik faoliyatini go‘zallik salonlarida kremlar sotishdan boshladi: ayollar sochlarini quritish vaqtida mijozlarga o‘zining mahsuloti haqida so‘zlab berardi. Keyinchalik 1946-yilda u turmush o‘rtog‘i bilan Nyu-Yorkda birinchi Estée Lauder do‘konini ochdi va ular biznesni kengaytirishga va go‘zallik korporatsiyasini qurishga muvaffaq bo‘ldi. Kompaniya boshqa yirik brendlar: MAC Cosmetics, Bobbi Brown, La Mer kabilardan o‘zib keta boshladi.
Este marketing dahosi bo‘lgan va ijtimoiy tarmoqlar yaratilishidan ancha avval kosmetika mahsulotlarini sotishda shaxsiy brend muhimligini tushungan. Lauder xaridorlar bilan shaxsan uchrashish va go‘zallik mavzusida yozuvchi nashr jurnalistlari bilan muloqot qilish uchun mamlakat bo‘ylab tez-tez sayohat qildi.
Frenk Tosken va Frenk Anjelo, MAC Cosmetics
Vizajist va fotograf Frenk Tosken hamda go‘zallik saloni rahbari Fren Anjelo 1984-yilda MAC Cosmetics brendini yaratdi. Ularning birinchi mahsuloti pushti lab bo‘yoqlari bo‘lib, Anjelo salonlaridan birining oshxonasida yaratilgan. Mahsulot tezda mashhurlikka erishdi va mazkur brend hozirda ko‘plab turdagi lab bo‘yog‘ini ishlab chiqaradi.
Brendning birinchi do‘koni Torontoda ochildi. Salon mashhur insonlar va san’atkorlar uchun go‘zallik maydoniga aylandi. Brend yaratuvchilari xodimlar tajribasini oshirish uchun sarmoya kiritdi va xizmat ko‘rsatish sifatini doimiy ravishda oshirdi.
1995-yilda kompaniyaning yarmi Estée Lauder korporatsiyasi tomonidan sotib olindi va natijada MAC yanada rivojlanishga va geografik jihatdan kengayishga muvaffaq bo‘ldi.
Olivye Bossan, L’Occitane
Bir kuni 23 yoshli Olivye parli distillyatni topib oldi va do‘stidan ijaraga olgan omborda lavanda va rozmarin o‘simliklaridan efir moylarini tayyorlay boshladi. Mahsulotlar sotuvi sekin-asta osha boshladi va Olivye tashlandiq sovun zavodini sotib olib, yirik ishlab chiqarishni yo‘lga qo‘ydi. Birinchi mahsulot xushbo‘y Marsel sovuni deb nomlandi. Tez orada Bossan o‘zining ilk do‘konini ochishga muvaffaq bo‘ldi.
Izoh (0)