Toshkentda fuqaro ozonni buzuvchi moddada ishlaydigan uskunalar olib kirishga urindi

Toshkentda ozon qatlamini yemiruvchi zararli moddalarda ishlaydigan uskunalar olib kirilishi to‘xtatib qolindi. Bu haqda poytaxt bojxona boshqarmasi xabar berdi. 

Qayd etilishicha, “Toshkent tovar” tashqi iqtisodiy faoliyat bojxona postida ekologiya uchun xavfli, ozon qatlamini yemiruvchi zararli moddalar va ular yordamida ishlovchi uskunalar importini nazorat qilishda postning Tovarlarni klassifikatsiyalash guruhi bilan birgalikda faoliyat olib borilmoqda.

Amaldagi tartibga ko‘ra, ozonni buzuvchi yoki ularga bog‘liq bo‘lgan moddalardan foydalangan holda ishlab chiqarilgan sovitish jihozlari va havoni konditsionerlash uskunalarini import qilish taqiqlangan.

Yaqinda postda xorijdan keltirilgan uskunalarni bojxona ko‘rigidan o‘tkazish davomida mazkur cheklovni buzishga urinishlar fosh qilingan.

Xususan, xorijdan keltirilgan yuqori bosimda havoni qurituvchi uskuna hamda ichimliklarni quyuvchi liniya uchun chiller uskunasi ozonni buzuvchi moddalar ro‘yxatiga kiritilgan R-22 freon moddasida ishlashi ma’lum bo‘lgan.

Shu sababli jami qiymati 143,5 million so‘mlik mazkur uskunalar hozirda vaqtincha saqlovga olingan. Ular kelgusida respublikadan chiqarib yuborilishi kutilmoqda.

Holat yuzasidan bojxona surishtiruvlari olib borilmoqda.