Toshkent viloyati “G‘ishtko‘prik” chegara bojxona posti orqali fuqaro tomonidan ratsiyalar olib o‘tishga bo‘lgan urinish to‘xtatib qolindi. Bu haqda viloyat bojxona boshqarmasi matbuot xizmati xabar berdi.
Qayd etilishicha, O‘zbekistonga o‘tish uchun “G‘ishtko‘prik” chegara bojxona postiga piyoda holda kirib kelgan fuqaroning qo‘l yuklari belgilangan tartibda bojxona ko‘rigidan o‘tkazilgan.
Natijada, og‘zaki so‘rovda maʼlum qilinmagan va yo‘lovchi bojxona deklaratsiyasida ko‘rsatilmagan hamda ruxsat beruvchi hujjatlari bo‘lmagan qiymati 40 million so‘mlik 30 dona ratsiya borligi aniqlangan.
Hozirda ushbu holat yuzasidan tergovga qadar tekshiruv harakatlari olib borilmoqda.
Vazirlar Mahkamasi qaroriga muvofiq, radioelektron vositalar va yuqori chastotali qurilmalarni sotib olish (berish), sotish va (yoki) o‘rnatish (qurish), O‘zbekiston hududiga olib kirish tegishli organlar ruxsatnomalariga ko‘ra amalga oshiriladi.
Avvalroq Qoraqalpog‘istonda 11 ta ratsiyadan tegishli ruxsatnomasiz foydalanish holati aniqlangani, Toshkentdagi qurilish obyektida 13 ta ratsiyadan tegishli ruxsatnomasiz foydalangan shaxsga chora ko‘rilgani to‘g‘risida xabar berilgandi.
Izoh (0)