Toshkent shahrida o‘zganing nomiga onlayn kredit rasmiylashtirib, pullarni o‘z ehtiyojlariga sarflab yuborgan ayol ushlandi. Bu haqda IIV Kiberxavfsizlik markazi xabar berdi.
Qayd etilishicha, Toshkent shahrida yashovchi 51 yoshli O.X. IIOga ariza bilan murojaat qilib, nomaʼlum sabablarga ko‘ra uning nomiga 44 million so‘m onlayn kredit rasmiylashtirilganini va aybdor shaxsga qonuniy chora ko‘rishlikni so‘ragan.
Tezkor-qidiruv xizmati Kiberxavfsizlik bo‘limi xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Toshkent shahrida yashovchi ayol X.U. sodir etgani aniqlangan.
Gumonlanuvchi X.U. jabrlanuvchi O.X.ga SMS-xabarnoma (soxta havola) yuborish orqali shaxsiy maʼlumotlarini qo‘lga kiritib, uning bank mobil ilovasiga ikkinchi foydalanuvchi sifatida ulanib olgan va pullarni o‘zining foydalanuvida bo‘lgan bank plastik kartasiga o‘tkazgan. Ayol mablag‘larni o‘z ehtiyojlariga sarflab yuborgani maʼlum bo‘lgan.
Mazkur holat yuzasidan X.U.ga nisbatan Jinoyat kodeksining 168-moddasi (firibgarlik) 3-qismi “g” bandi bilan jinoyat ishi qo‘zg‘atilgan.
- Avvalroq Andijonda o‘zgalar nomiga onlayn kredit rasmiylashtirgan soxta bankir ushlangani,
- Farg‘onada “betob qizning operatsiyasi uchun” deya o‘zganing nomidan akkaunt ochib, pullarni o‘zlashtirib kelgan shaxs qo‘lga olingani to‘g‘risida xabar berilgandi.
Izoh (0)