Surxondaryo viloyatida qiymati 1 milliard so‘mdan ortiq noqonuniy tamaki mahsulotlari to‘xtatib qolindi. Bu haqda viloyat bojxona boshqarmasi matbuot xizmati xabar berdi.
Qayd etilishicha, bojxona organlari tomonidan tamaki mahsulotlarining noqonuniy aylanmasiga qarshi tizimli tarzda kurash olib borilmoqda. Jumladan, Surxondaryo viloyati bojxona boshqarmasi “Ayritom” chegara bojxona postiga qo‘shni davlatdan kirib kelgan fuqaro T.B. boshqaruvidagi yuk avtotransport vositasi belgilangan tartibda bojxona postida mavjud inspeksion ko‘rik majmuasidan o‘tkazilgan. Tekshiruvda rentgen tasvirlari avtotransport vositasida yuk kuzatuv hujjatlarida keltirilgan tovarlardan boshqa tovarlar borligini ko‘rsatgan. Shundan so‘ng, avtotransport vositasi xolislar ishtirokida bojxona ko‘rigidan o‘tkazilgan.
Natijada, avtotransport vositasi yukxonasida xufiyona tarzda qog‘oz qutilarga joylashtirilgan, yuk kuzatuv hujjatlarida ko‘rsatilmagan, xorijda ishlab chiqarilgan va aksiz markalari bo‘lmagan umumiy qiymati 1 milliard 26 million so‘mlik jami 27 ming quti uch xil nomdagi sigaret mahsulotlari yuklangani maʼlum bo‘lgan.
Hozirda mazkur holat yuzasidan bojxona organlari tomonidan tekshiruv harakatlari olib borilmoqda.
Avvalroq Chust tumanida 5 ming quti “Milano” nomli aksiz markasiz tamaki mahsulotlari savdosi to‘xtatib qolingan edi. Undan oldin ham Namanganda 2 ming quti aksiz markasiz tamaki mahsulotlari muomalaga kiritilishining oldi olingandi.
Izoh (0)