Тошкентда озон қатламини емирувчи зарарли моддаларда ишлайдиган ускуналар олиб кирилиши тўхтатиб қолинди. Бу ҳақда пойтахт божхона бошқармаси хабар берди.
Қайд этилишича, “Тошкент товар” ташқи иқтисодий фаолият божхона постида экология учун хавфли, озон қатламини емирувчи зарарли моддалар ва улар ёрдамида ишловчи ускуналар импортини назорат қилишда постнинг Товарларни классификациялаш гуруҳи билан биргаликда фаолият олиб борилмоқда.
Амалдаги тартибга кўра, озонни бузувчи ёки уларга боғлиқ бўлган моддалардан фойдаланган ҳолда ишлаб чиқарилган совитиш жиҳозлари ва ҳавони кондиционерлаш ускуналарини импорт қилиш тақиқланган.
Яқинда постда хориждан келтирилган ускуналарни божхона кўригидан ўтказиш давомида мазкур чекловни бузишга уринишлар фош қилинган.
-0pWBDEyQ.jpg)
Хусусан, хориждан келтирилган юқори босимда ҳавони қуритувчи ускуна ҳамда ичимликларни қуювчи линия учун чиллер ускунаси озонни бузувчи моддалар рўйхатига киритилган R-22 фреон моддасида ишлаши маълум бўлган.
Шу сабабли жами қиймати 143,5 миллион сўмлик мазкур ускуналар ҳозирда вақтинча сақловга олинган. Улар келгусида республикадан чиқариб юборилиши кутилмоқда.
Ҳолат юзасидан божхона суриштирувлари олиб борилмоқда.
Изоҳ (0)