Hindistonning Uttar-Pradesh shtatidagi kasalxonada 45 yoshli o‘zbekistonlik ayol hammomda o‘zini o‘ldirgan holda topildi. Bu haqda politsiyaga tayanib, Deccan Herald xabar berdi.
Hodisa 11-iyun kuni Kaushambi shahridagi xususiy kasalxonada sodir bo‘lgan. Ayol 25-may kuni jigar ko‘chirib o‘tkazish operatsiyasi uchun kasalxonaga yotqizilgan.
U tuzalayotgandi va ikki kun ichida kasalxonadan chiqarilishi kerak edi, — deydi muassasa bosh shifokori.
Ayol bilan birga unga donorlik qilgan turmush o‘rtog‘i va o‘g‘li ham bo‘lgan. Hodisa yuz bergan kun ayol palatasi yonidagi hammomga kirgan va uzoq vaqt chiqmagan. Eri rafiqasi uzoq vaqtdan beri hammomdan chiqmagani uchun shifoxona xodimlariga xabar bergan. Shifoxonaning xavfsizlik xodimlari eshik ichkaridan qulflanganini aniqlagach, politsiya bo‘limiga murojaat qilgan.
Politsiya xodimlari ayolning jasadini hammomdagi ilgichga osilgan holda topgan. Jasad o‘limdan keyingi tekshiruvga yuborilgan va sud-tibbiyot ekspertlari guruhi voqea joyini ko‘zdan kechirgan.
U egnidagi hijob bilan o‘zini osib qo‘ygan. Huquqiy rasmiylashtirish ishlari yakunlanib, natijalar kutilmoqda. Hodisa sabablari o‘rganilmoqda, — deydi Indirapuram politsiyasi komissari yordamchisi Kumar Singx.
Izoh (0)