“Barselona” 2017-yilda Mbappeni xarid qilish imkoniyatidan voz kechib, Dembelega e’tibor qaratgani ma’lum bo‘ldi

Sobiq agent Xosep Mariya Mingelya Kilian Mbappe “Barselona”ga o‘tishi mumkin bo‘lgani haqida gapirib o‘tdi.

Kecha “Real” Mbappe bilan shartnoma imzolaganini rasman e’lon qildi.

“Fransiyada bo‘lib turgan o‘g‘lim “Monako” o‘z futbolchilarini sotayotganini ayytdi. Shunda men uning (Mbappe) ota-onasi bilan gaplashdim. Yigitcha 18 yoshda edi va Neymarning Kataloniyani tark etishi fonida “Barselona”ga o‘tishga rozilik bergandi. Bu haqida “Barselona”ga xabar bergandim. Lekin ular bunday narxga yaxshisi Dembeleni xarid qilishini aytgan. O‘sha paytda rahbariyatni “Borussiya D”da to‘p surayotgan Usmon ko‘proq qiziqtirgandi. Bu juda qisqa, ammo qayg‘uli hikoya.

“Barselona” hozir moliyaviy qiyinchiliklarni boshdan kechirmoqda. Uning ustida Florentino Peres boshchiligidagi “Real” kundan kunga yanada kuchayib bormoqda”, — deydi Mingelya.

Mbappe 2017-yilda “Monako”dan “PSJ”ga ijara asosida o‘tgan edi. 2018-yilda parijliklar futbolchining transferini to‘liq sotib olgan. 7 mavsum davomida futbolchi 256 ta gol bilan klub tarixida eng yaxshi to‘purarga aylandi. 

Jamoa bilan birgalikda 6 marta Fransiya chempionligini, 4 marta Fransiya Kubogini, 3 marta Fransiya Superkubogini, 2 marta Liga Kubogini qo‘lga kiritdi.