Kinematografiya agentligi direktori Firdavs Abduxoliqov boshqa ishga o‘tgani sabab egallab turgan lavozimidan ozod etilgani haqida xabar berilgandi.
Bosh vazir matbuot kotibining ma’lum qilishicha, Firdavs Abduxoliqov Vazirlar Mahkamasi huzuridagi O‘zbekistondagi Islom sivilizatsiyasi markazi direktori etib tayinlandi. Shu munosabat bilan Shoazim Shoislamovich Minovarov ushbu lavozimdan ozod qilindi.
Shoazim Minovarov 2017-yil 17-iyuldan hozirgacha O‘zbekiston islom sivilizatsiyasi markazi direktori lavozimida ishlab kelayotgan edi.
2020-yili 100 dan ortiq kinoijodkor Firdavs Abduxoliqov ustidan bosh vazir Abdulla Aripovga shikoyat qilgan edi. Murojaatchilar Firdavs Abduxoliqov kinematografiya sohasini rivojlanish bo‘yicha kompleks yondashuv va konseptual qarorlarni qabul qilish o‘rniga sohani rivojlantirishga mutlaqo aloqador bo‘lmagan faoliyat bilan shug‘ullanib kelayotgani, ko‘p yillik tajribaga ega xodimlarni chetlatib, ularning o‘rniga kino sohasidan yiroq bo‘lgan, uning o‘zigagina qarashli odamlarni boshqarma va bo‘limlar rahbarligiga tayinlash amaliyoti yo‘lga qo‘yilganini ta’kidlagandi.
Firdavs Abduxoliqov 1992—1995-yillarda O‘zbekistondagi dastlabki xususiy telekanallardan biri — “STV” va ilk nodavlat gazetalardan biri — “Darakchi”ga asos solgan. U uzoq yillar davomida O‘zbekiston Elektron ommaviy axborot vositalari milliy assotsiatsiyasiga rahbarlik qilgan.
Abduxoliqov 2019-yil sentyabrida o‘sha vaqtdagi “O‘zbekkino”ga rahbar etib tayinlangan edi.
Izoh (0)