Kinematografiya agentligi direktori Firdavs Abduxoliqovga nisbatan manfaatlar to‘qnashuvi yuzasidan qo‘zg‘atilgan ma’muriy ish davlat mablag‘larini noqonuniy o‘zlashtirganlik holati bilan bog‘liq emas. Bu haqda 10-mart kuni bo‘lib o‘tgan matbuot anjumanida Korrupsiyaga qarshi kurashish agentligi direktori Akmal Burhonov aytib o‘tdi, deya xabar bermoqda “Daryo” muxbiri.
Eslatib o‘tamiz, Korrupsiyaga qarshi kurashish agentligi yanvar oyida Firdavs Abduxoliqov atrofidagi manfaatlar to‘qnashuvi yuzasidan tekshiruv o‘tkazgandi. Tekshiruv natijasida “Sevimli” telekanali bilan manfaatlar to‘qnashuvi borligini tasdiqlagan. Unga ko‘ra, agentlik rahbari yaqin qarindoshlari (turmush o‘rtog‘i, qizi va o‘g‘li) ta’sischiligidagi korxonalar manfaatlarini ko‘zlab, davlat budjetidan juda ko‘p miqdordagi pul mablag‘larining ajratilishiga erishib, qonun buzilishi holatlariga yo‘l qo‘ygan. Sud Firdavs Abduxoliqovni ma’muriy huquqbuzarlik sodir etgan deb topib, unga nisbatan bazaviy hisoblash miqdorining 30 baravari (8 million 100 ming so‘m) miqdorida jarima jazosi tayinlagan.
Akmal Burhonovning aytishicha, agar Firdavs Abduxoliqov budjet mablag‘larini noqonuniy o‘zlashtirgani aniqlanganda, u jinoiy javobgarlikka tortilgan bo‘lardi.
“Kinematografiya agentligi direktori nima uchun ma’muriy javobgarlikka tortildi, unga nisbatan kichik jarima qo‘llandi, nega jinoiy javobgarlik bo‘lmadi, degan mazmundagi ko‘p muhokamalar bo‘ldi. Aytish kerakki, bu yerda davlat mablag‘larini noqonuniy o‘zlashtirganlik holati mavjud emas, ya’ni pullar kimningdir cho‘ntagiga tushgan holat yo‘q. Gap davlat xaridlarini amalga oshirish — tanlovni e’lon qilishda manfaatlar to‘qnashuvi borligi haqida xabardor etmagani to‘g‘risida ketmoqda”, — dedi agentlik rahbari.
Uning alohida ta’kidlashicha, ajratilgan pullar qonuniy ishlatilgan, pullarni noqonuniy sarflash holati bo‘lmagan.
“Berilgan buyurtma asosida material tayyorlab berilgan. Pullar to‘g‘ri sarflangan. Manfaatlar to‘qnashuvi borligi va undan o‘zini chetlashtirmagani bo‘yicha ma’muriy javobgarlik belgilangan. Uncha pulni kimdir yeb yuborib, davlat budjeti talon-toroj qilinmagan. Holat prokuratura organlari tomonidan o‘rganilgan, agar pullar noqonuniy ishlatilganda, Jinoyat kodeksining tegishli moddalari bilan javobgarlikka tortilardi. Shu e’tiborga olinishini so‘rab qolgan bo‘lardim”, — dedi Akmal Burhonov.
Avvalroq Akmal Burxonov 2022-yil yakunigacha davlat xizmatchilarining daromadlari va mol-mulklari deklaratsiyasi jamoatchilikka ochiqlanishini ma’lum qilgandi.
Izoh (0)