Iyun oyining birinchi ish haftasi davomida O‘zbekiston bo‘yicha quruq ob-havo bo‘lishi kutilmoqda, deb xabar berdi “O‘zgidromet”.
Faqat ayrim tog‘oldi va tog‘li hududlarda, shuningdek, 4—5-iyun kunlari Farg‘ona vodiysi viloyatlari bo‘yicha ba’zi joylarda momaqaldiroq bo‘lishi, qisqa muddatli yomg‘ir yog‘ishi mumkin.
Ushbu kunlarda respublika hududining katta qismida qulay harorat foni saqlanib turadi, haftaning birinchi yarmida harorat 29-32 daraja, haftaning ikkinchi yarmida 32-35 daraja bo‘ladi. Faqat janubda cho‘l hududlarda harorat kunduz kunlari 36-39 darajagacha ko‘tariladi.
Shamol 7-12 metr/sekund tezlikda esadi, 3—5-iyunda respublika bo‘yicha ba’zi joylarda 13-18 metr/sekundgacha kuchayishi, ayrim joylarda chang-to‘zon bilan kuzatilishi mumkin.
Toshkentda havo biroz bulutli, vaqti-vaqti bilan o‘zgaruvchan bo‘ladi. Harorat 3—5-iyunda 30-33 daraja, 6—7-iyunda 32-35 daraja bo‘ladi. Harorat asosan kechalari 18-21 darajagacha bo‘ladi.
Izoh (0)