Joriy yilning 29-may kuni poytaxt havosi tarkibidagi kislorod miqdori meʼyoridan pasayib ketgani aytilmoqda. Mutaxassis fikricha, bunga bir necha omillar taʼsir qilgan bo‘lishi mumkin.
Iqtimshunos Erkin Abdulahatov Telegram’da Toshkent shahrida havo tarkibidagi kislorod miqdori pasayib ketgani haqida yozdi.
“Havaskor tadqiqotchilarimizdan biri 29-may kuni poytaxtda havo tarkibidagi kislorod o‘lchanganda miqdor 19,5 foizdan pasayib ketgani, aksincha havoda azot miqdori sezilarli ortganini aniqlagan. Kislorod yetishmovchiligi kishilarning to‘yib uxlamasligida yaqqol ko‘rinadi. Ayni ko‘klamda poytaxtda kislorod yetishmovchiligi iqlimiy omil, sunʼiy suv obyektlarining kamligi sabab ro‘y bermoqda. Sunʼiy suv obyektlarida xlorella kabi suv o‘tlarini ko‘paytirish vaziyatni birmuncha yumshatadi. Kelgusida poytaxt va yirik shaharlarda ham Argentinaning yirik shaharlaridagi kabi havo tarkibidagi karbonat angdridni yutib, doimiy kislorod ishlab chiqaradigan qurilmalar o‘rnatishga ehtiyoj oshib boraveradi”, — deb yozgan mutaxassis.
Erkin Abdulahatovning qo‘shimcha qilishicha, harorat ko‘tarilishi havo tarkibidagi kislorod kamayishi va atmosfera bosimining pasayishi surunkali kislorod yetishmovchiligiga olib keladi. Bu arterial gipertoniya, yurakning ishemik xastaligi, nafas olish o‘pka kasalliklari bo‘lgan bemorlarga salbiy taʼsir qiladi.
“Ayniqsa, yirik shaharlar, yashil fitomassa, sunʼiy suv obyektlaridan holi yirik tekislik shaharlarda bu yanada kuchli seziladi. Tog‘ etaklari, yashil qoplamalar, ko‘plab suv obyektlari atrofidagi hududlarda bu kabi holat kuzatilmaydi hisob”, — deya qayd etgan u.
Shu bilan birga, iqlimshunos bemorlarga bir qancha tavsiyalar bilan o‘rtoqlashgan.
“Yuqoridagi xastalikka moyil aholi qatlami shifokor bilan maslahatlashib, nafas olish mashqlarini bajarishi, nisbatan sovuq suv muolajalarini qabul qilishi, yurak-qon tomir faoliyatini rostlovchi dori-darmonlarni isteʼmol qilishi tavsiya etiladi. Nisbatan salqin joylarda yurish, kuchli zo‘riqish, aqliy mehnatlarni kuchaytirish tavsiya etilmaydi”, — deb yozgan Erkin Abdulahatov.
Avvalroq “O‘zgidromet” 3–6-iyun kunlari kuzatiladigan ob–havo harorati bo‘yicha prognozlarini eʼlon qilgandi. Unga ko‘ra, kelgusi to‘rt kun davomida mamlakatda havo harorati 30–39 daraja issiq bo‘lishi kutilmoqda.
Izoh (0)