Toshkent va Andijon viloyatlarida muvofiqlik sertifikati hamda bitim olib berishni vaʼda qilgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Chirchiq shahar bo‘limi tomonidan DXX xodimlari bilan hamkorlikda tadbirkorlik subyektlari huquqlarini himoya qilish yuzasidan tezkor tadbir o‘tkazilgan. Tadbirda fuqaro Sh.D. “C.B.” MCHJ rahbari Sh.Sh.ning ishonchiga kirib, unga go‘yoki yuqori lavozimda ishlovchi tanishlari yordamida ushbu MCHJda ishlab chiqarilgan beton mahsulotlari uchun Toshkent viloyati “Qurilish va uy joy kommunal sohasida hududiy nazorat inspeksiyasi”ning laboratoriya xulosasi hamda muvofiqlik sertifikatini rasmiylashtirib berishi evaziga 700 dollarni olgan vaqtida ashyoviy dalillar bilan ushlangan.
Shu kabi, departamentning Asaka tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda M.J. ismli shaxs fuqaro D.S.ning ishonchiga kirib, unga yuqori lavozimda ishlovchi tanishlari yordamida oilaviy maktabgacha taʼlim tashkiloti tashkil qilishi uchun bitim tayyorlab berishi evaziga 500 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda 2 ming dollarga til sertifikatini olib berishni va’da qilgan institut o‘qituvchisi ushlangani, Qoraqalpog‘istonda imtihonsiz haydovchilik guvohnomasi olib berishni va’da qilgan shaxslar qo‘lga olingani, Xovos tumani hokimi o‘rinbosari, Qarshi tumani IIB xodimi va Sergeli tumani profilaktika inspektori pora bilan qo‘lga tushgani to‘g‘risida xabar berilgandi.
Izoh (0)