Davlat xavfsizlik xizmati xodimlari tomonidan Sirdaryo, Qashqadaryo, Toshkent viloyatlari hamda Toshkent shahrida korrupsion holatlarga chek qo‘yildi.
Qayd etilishicha, Sirdaryo viloyatining Xovos tumani hokimi o‘rinbosari o‘z xizmat mavqeyidan foydalanib, qishloq xo‘jaligi mahsulotlari yetishtirish va eksport qilish bilan shug‘ullanuvchi MCHJga tegishli yerlarni hokimlik zaxirasiga olmaslik, aksincha, sug‘orish ishlariga sharoit yaratib berish va faoliyatiga hech kim aralashmasligi evaziga 20 ming dollar talab qilgan. U 1 000 dollar olgan vaqtida Davlat xavfsizlik xizmati va prokuratura xodimlari tomonidan ushlangan.
“Hududiy elektr tarmoqlari” AJ Toshkent viloyat filialining bo‘lim boshlig‘i va muhandisi o‘zaro til biriktirib, Qibray tumanidagi qandolatchilik mahsulotlari ishlab chiqaruvchi korxonani 3 fazali elektr tarmog‘iga ulash va transformator o‘rnatib berish, shuningdek, boshqa texnik hujjatlarini tayyorlashda ko‘maklashish evaziga 39 ming dollar miqdorida pora talab qilgan.
Davlat xavfsizlik xizmati xodimlari tomonidan Bosh prokuratura huzuridagi departament bilan hamkorlikda o‘tkazilgan tezkor tadbirda “Hududiy elektr tarmoqlari” AJ Toshkent viloyat filiali muhandisi so‘ralgan puldan 30 ming dollarni olgan vaqtida ushlangan.
Yana bir holda Qashqadaryo viloyati Qarshi tumani IIB jinoyat qidiruv bo‘linmasi katta tezkor xodimi xizmat mavqeyidan foydalanib, o‘zining ish yurituvida bo‘lgan tergovga qadar tekshiruv materiali yuzasidan yakka tartibdagi tadbirkorga nisbatan Jinoyat-protsessual kodeksining 83-moddasi 2-bandiga asosan jinoyat ishi qo‘zg‘atishni rad etish evaziga, tamagirlik yo‘li bilan undan 1500 dollar miqdorida pora talab qilgan va oldindan ushbu pul mablag‘i hisobidan 400 dollar olgan.
U talab qilingan puldan yana 400 dollarni olgan vaqtida Davlat xavfsizlik xizmati xodimlari tomonidan ushlangan.
Davlat xavfsizlik xizmatining Toshkent shahar bo‘yicha boshqarmasi xodimlari tomonidan Bosh prokuratura huzuridagi departament bilan hamkorlikda o‘tkazilgan tezkor tadbirda Sergeli tumani IIO FMB 2-sonli ichki ishlar bo‘limi profilaktika inspektori 5 ming dollarni pora sifatida olgan vaqtida ushlangan.
Aniqlanishicha, bu pul evaziga, o‘zaro janjal oqibatida xorijiy fuqaroga tan jarohati yetkazgani bo‘yicha mahalliy fuqaroga nisbatan jinoyat ishi qo‘zg‘atmasdan, holatni maʼmuriy huquqbuzarlik sifatida malakalashni vaʼda qilgan.
Hozirda barcha holatlar yuzasidan jinoyat ishlari qo‘zg‘atilib, mazkur shaxslarga nisbatan qamoq ehtiyot chorasi qo‘llanilgan.
Izoh (0)