Toshkent shahri va Namangan viloyatida noqonuniy yo‘llar bilan o‘qishga kiritib qo‘yishni vaʼda qilgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Mirobod tumani bo‘limi va DXX xodimlari hamkorligida tezkor tadbir o‘tkazilgan. Tadbirda D.A. va U.F. ismli shaxslar ikki nafar fuqaroni Toshkent kimyo texnologiyalari institutining Samarqand filialiga 2-bosqichdan o‘qishga kiritib qo‘yish evaziga 5,5 ming dollarni olgan vaqtlarida ashyoviy dalillar bilan ushlangan.
Shu kabi, departamentning Yangi Namangan tuman bo‘limi tomonidan o‘tkazilgan tezkor tadbirda X.T. ismli shaxs fuqaro I.S.ning ishonchiga kirib, uni qo‘shni Qirg‘izistondagi universitetga o‘qishga kiritib, keyinchalik o‘qishni Namangan davlat universitetiga ko‘chirib berishi evaziga 3 ming dollarni olgan vaqtida ashyoviy dalilar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Buxoro va Farg‘ona viloyatlarida o‘qishni ko‘chirib berish bilan bog‘liq firibgarlik holatlariga chek qo‘yilgandi. Shuningdek, O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgan edi.
Izoh (0)