Шимолий Корея яна чиқинди билан тўлдирилган ҳаво шарларини Жанубий Кореяга учирди. Бу ҳақда Корея Республикаси Қуролли кучлари ахборотига таяниб, Yonhap агентлиги хабар берди.
Бу бир ҳафта ичида содир бўлаётган иккинчи ҳодиса. Yonhap агентлиги хабарига кўра, 28 ва 29 май кунлари КХДР Жанубий Корея томон 260 га яқин ҳаво шарларини учирган эди.
Ҳарбий маълумотларга кўра, маҳаллий вақт билан тахминан 20:45 атрофида ўнга яқин шарлар Жанубий ва Шимолий Корея ўртасидаги чегара чизиғини кесиб ўтган, шундан сўнг уларнинг аксарияти Сеулни ўраб турган Кёнги провинциясига учиб кетган. Бирлашган штаб бошлиқлари фуқароларга қулаган шарларга яқинлашмасликни ва бу ҳақда расмийларга хабар беришни тавсия қилган.
Бундан ташқари, Жанубий Корея ҳукумати маҳаллий аҳолига номаълум объект Шимолий Кореянинг тарғибот варақалари бўлиши мумкинлиги ҳақида огоҳлантириш матнини юборган. Маҳаллий аҳоли очиқ ҳавода дам олишдан тийилишга чақирилган.
Эндиликда Жанубий Кореяда яшовчи фаоллар ва шимолий кореялик дефекторлар шу йўл билан КХДРга ҳукуматга қарши варақалар, пуллар, шунингдек, тақиқланган газета ва китобларни жўнатишмоқда. Шимолий Корея бир неча бор бундай ҳаракатларни тўхтатишга чақирган ва 26 май куни Шимолий Корея расмийлари жавоб чоралари билан таҳдид қилган.
Ахлат шарларини учиргач, Шимолий Корея етакчисининг синглиси Ким Ё Чен мамлакат ҳаракатларини “сўз эркинлиги” кўринишига, Жанубий Корея варақалари мазмунини эса “сиёсий ахлат”га қиёслаган.
Жанубий Кореянинг аввалги ҳукуматлари фаолларнинг бундай кампанияларни ўтказишини тўхтатишга уриниб, улар тинчликни тарғиб қилмаслигини ва чегара яқинидаги аҳоли хавфсизлигига таҳдид солаётганини айтишган. 2021 йилда киритилган ҳаво шарларини учиришни тақиқлаш кейинчалик Олий суд томонидан сўз эркинлигини бузганлиги сабабли конституцияга зид деб топилган.
Изоҳ (0)