Акмал Саидов БМТ Инсон ҳуқуқлари қўмитаси аъзоси бўлди

БМТ Инсон ҳуқуқлари қўмитасининг 2025–2028 йиллар учун 9 нафар аъзосини сайлаш бўйича сайловлар бўлиб ўтди, деб хабар беради “Дунё” агентлиги.

Қайд этилишича, сайловда Ўзбекистон билан бирга 16 та давлат — Бурунди, Грузия, Миср, Ҳиндистон, Испания, Камерун, Кот-д’Ивуар, Литва, Марокаш, Парагвай, Корея Республикаси, Шимолий Македония, Того, Хорватия, Эфиопия ва Жанубий Африка вакиллари 9 та ўрин учун кураш олиб борган.

Яширин овоз бериш натижаларига кўра, Ўзбекистондан номзод, Инсон ҳуқуқлари бўйича Миллий марказ директори, академик Акмал Саидов Фуқаролик ва сиёсий ҳуқуқлар тўғрисидаги халқаро пактга аъзо мамлакатлардан энг кўп овоз олган.

Мамлакатимиз вакилининг ИHQга сайланиши тарихий воқеадир, чунки Ўзбекистон Марказий Осиё давлатлари орасида биринчи марта БМТнинг ушбу асосий органига аъзо бўлди, — дейилади хабарда.

Инсон ҳуқуқлари қўмитаси — БМТнинг мустақил экспертлардан иборат органи бўлиб, аъзо давлатлар томонидан Фуқаролик ва сиёсий ҳуқуқлар тўғрисидаги халқаро пактнинг бажарилишини мониторинг қилади. Ушбу пактга 173 та давлат аъзо. Ўзбекистон ушбу халқаро ҳужжатга 1995 йилда қўшилган. Қўмита фаолияти инсоннинг барча фуқаролик ва сиёсий ҳуқуқлари тўлиқ ҳурмат қилинишини таъминлашга қаратилган.

Маълумот учун, Акмал Саидов 1994—1996 йилларда Ўзбекистоннинг Франциядаги фавқулодда ва мухтор элчиси, шунингдек, Ўзбекистоннинг UNESCO ҳузуридаги доимий вакили сифатида фаолият кўрсатган. Президент фармонига мувофиқ, 1996 йил октябрь ойидан буён Инсон ҳуқуқлари бўйича Ўзбекистон Республикаси Миллий маркази директори лавозимида ишлаб келмоқда.